New Zealandimiit savaaqqanik tikisitanik nioqqutissiorneq Narsami suliffissanik 12-nik pilersitsisoq

Piffissami junip naaneraniit septemberip aallartinnerata tungaanut Narsami Neqi A/S-imi savaaqqanik 3.000-nik New Zealandimiit tikisitanik nioqqutissiorneq ingerlanneqarpoq. Qaammatit pingasut ingerlaneranni suliffissat 12-it pilersinneqarput, nioqqutissiassaaleqinerlu pissutigalugu matoqqanissaq taamalu sulisunik angerlartitsiinnarnissaq pinngitsoorneqarpoq.

Neqi A/S 2013-mi nutarterneqarpoq. Tamatuma kingorna ukiumut nioqqutissiarineqarsinnaalerput savat savaaqqallu 32.000-it. Kujataani savaatillit 2014-mi savat savaaqqallu 22.000-it toqoraavimmut tunivaat. Taakku nioqqutissiarineqarlutik tamarmik nunatsinni pisiniarfinnut tunineqarput junimi.   

Per Jensen, pisortaq, Neqi A/S:
- New Zealandimiit savaaqqat neqaannik pisiniarnissatsinnut patsisaavoq savaaqqat neqaannik nunatsinni pisisartut noqqaassuteqarnerisa annertusiartuinnarnera minnerunngitsumillu fabrikkimi sulisut sulisoriinnarnissaannik kissaateqarnerput. Pingaaruteqarpoq oqaatigissallugu New Zealandimiit savanik pisiniarnerput malunnaatilimmik iluanaarutiginnginnatsigu tassami nioqqutissiassat taakku nunatsinnut eqqunneranni akitsuut akilertussaagatsigu.

Neqi A/S-ip New Zealandimiit savaaqqap neqaanik pisiniartigani qulakkeeqqaarpaa Pilersuisup Pisiffiullu nioqqutissiassanik taakkuninnga pisiumanissaa. Nioqqutissat nalunaarsorneqartarnerannut inatsit naapertorlugu nioqqutissiarineqartut New Zealandimeersuunerannik nalunaaqutserneqarput.

Tunisat ikinnerunissaat naatsorsuutigineqarpoq

Savaatillit toqoraavinnut apuuttagaat ukiut ingerlaneranni amerliartorsimapput – ukioq manna tikillugu. Neqi A/S-ip naatsorsuutigaa ukiormanna savat savaaqqallu pisiarissallugit 18.000-20.000-t missaanniittut. Taamaattumik paasinarsereerpoq nioqqutissiorsinnaassuseq tamaat atorneqassapput amigaatigineqassasut 10.000-12.000-it missaanniittut.  

Pissutsit taama inissisimanerat siunissaq isigalugu Neqi A/S-imut unammilernartuussaaq annertooq. Savaatilinniit toqoraavimmut apuunneqartartut amerlinngippata illuatungaanilu pisisartut piumasaat annertusiartortoq naammassineqassappat suliffissallu naleqaqisut pingaaruteqaqisullu pigiinnarneqassappat periarfissaq ataasituaassaaq, tassalu savaaqqat neqaannik nioqqutissiassanik avataaniit tikisitsineq.  

FAKTA

Neqi A/S suliffeqarfissuup KNI-p pigisaraa. Neqi A/S-ip pisiarisarpai savat savaaqqallu Kujataani savaatilinneersut – annerusumik uani paasissutissat pisinnaavatit https://www.kni.gl/kl/vores-virksomheder/om-neqi/.

Neqi A/S-ip qulakkeerpaa savaaqqat nunatsinneersut nioqqutissiarineqarnerat tuniniarneqarnerallu pitsaanerpaaq. Neqi A/S-ip aamma qulakkeerpaa savaaqqat assigiinngitsunngorlugit nioqqutissiarineqartut pitsaanerpaaq, aamma savaaqqat avataaneersuuppata.