40 miliuunit krone-nik aningaasaliissuteqarnikkut
Neqi-mi siunissaq qularnaarneqarpoq

Narsami toqoraavimmut 40 miliuunit krone-nik aningaasaliissuteqarnissaq KNI-mi siulersuisut akuersissutigaat

Kujataani toqoraavik Neqi kiisaana siunissarissaalersoq. Toqoraavimmi nutaamik nersutaasiviliortoqassaaq kiisalu toqoraavimmik nutaarluinnarmik aamma sanasoqassalluni. Taakkualu saniatigut nioqqutissiornermut attuumassutillit suulluunniit tamarmik pisariaqarluinnalersimasumik nutarteriffigineqassapput, ingerlatsineq naammassisaqarfiulluartoq minnerunngitsumillu nioqqutissianik ineriartortitsineq pitsanngorsaanerlu maannamut suli anguneqanngitsoq periarfissikkumallugu. Ukiunimi arlalinngortuni ukiumut toqoraasoqalernerit tamaasa miliuunilikkaanik kipisuitsumik aningaasaliineqartariaqartarsimavoq, iluarsiigallarnertigut piumasaqaatit pinngitsoorneqarsinnaanngitsut naammassisinnaasarumallugit. Maannakkullu piumasaqaatinut nutaaliaasunut naapertuuttumik aatsaat iluamik toqoraavimmik pilersitsisoqarsinnaalerpoq.

Aningaasaliissuteqarnikkullu toqoraavimmi nutaami siunissami ukioq kaajallallugu suliffinnik pilersitsineqassaaq kiisalu inuussutissalerinermik ilinniarfik Inuili aamma Narsamiittoq suleqatigalugu, ilinniartunik amerlanerusunik ilinniartitsisoqarsinnaasalissaaq.

Kujataani inuussutissanik nioqqutissiornermut nangilluni ineriartortitsinermut toqoraavik Narsamiittoq pingaaruteqarluinnartuuvoq, ullutsinnullu naleqqussakkanik atortoqarnermigut nunalerinermi inuussutissarsiornikkut siunissami suliassaminik kivitsinissaminut Neqi sakkussaqalerpoq.

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl