Ukiup affaanut naatsorsuutit

KNI A/S-p ukiup affaanoortumik nalunaarutaata 1. april – 30. september 2021-moortup takutippaa akileraarutit akilinnginnerini angusat katillugit 32,5 mio. kr.-iusut. Polaroilip sinneqartooruteqarneranit kiisalu nioqquteqarnermik ingerlatsiviup aamma Neqi A/S-ip amigartooruteqarnerinit angusat katitigaapput.

KNI-p ukiumut naatsorsuutini 2020/21-moortut naammassigamigit quimi uninngasuutinut nalikilliliinermullu tunngasut allannguuteqaratarsinnaanerat ilisimavai. Allannguutaratarsinnaasut ilai ukiup affaanut nalunaarummi matumani ilanngullugit suliarineqarput, allannguutaasullu nioqquteqarnermut ingerlatsiviup Neqi A/S-illu angusaannut pitsaanngitsumik sunniuteqarput.

Angusat ukiuni siuliini naatsorsuutinik allanngortiterisoqartarsimanerata kingunerisaanik naatsorsuutigineqareersutut appasinnerupput, tamannali ingerlatseqatigiiffiup ingerlanneqarneranut sunniuteqarnerluttussatut isigineqanngilaq. Niuernermik ingerlatat siunissami sinneqartoorfiullutik ingerlajumaartut suli naatsorsuutigineqarpoq. Ajornartorsiutit suunerat ilisimaneqarput, tamakkulu piginittut suleqatigalugit aaqqiivigineqarsinnaapput.

KNI-p suliffeqarfiutaa Neqi A/S pissusissamisuunngitsunit ukiumoortumik nalunaarummi 2020/21-mi nassuiarneqartunit assut eqqorneqarsimavoq. Akuerineqanngitsunik nuussisarsimanerit iluarsineqareernerinit maannakkut paasinarsivoq Neqi A/S ukiuni arlalinni amigartoorfiulluni ingerlanneqarsimasoq. KNI-mi aalajangerpugut Neqi A/S-ip aningaasaqarnerata siunissami inaarutaasumik paasineqarnissaata tungaanut suliffeqarfittut pingaarnertut aningaasatigut tapersersorniarlutigu. Ajornartorsiutip qanoq suliarineqarnissaa pillugu maanna KNI Namminersorlutik Oqartussanik oqaloqateqarpoq, ukiullu naatsorsuiffiusup matuma naannginnerani aaqqiissuteqartoqarnissaa naatsorsuutigineqarpoq.

KNI A/S-imi ukiut ingerlanerini naatsorsuutinut inississuisarsimanermik misissuinermik maannakkut annertuumik suliaqartoqarpoq. Ukiut ingerlanerini naatsorsuutinut inississuisarsimanerit pillugit kiisalu suleriutsinik nakkutilliinermilu atortunik nutaanik atuutsitsilerniarnermik suliaqarneq ukiup naatsorsuiffiusup atuuttup naanissaata tungaanut ingerlanneqassaaq, taamalu ililluni ingerlatseqatigiiffiup ukioq naatsorsuiffiusoq tuleq aallartittussaavaa naatsorsutit iluarsaatassaqartinnagit.

Siulersuisut siulittaasuat Svend Hardenberg: ”KNI-p aningaasaqarnerata killiffia ukiup affaanoortumik nalunaarutip ersarissumik takutikkaa siulersuisut naammagisimaarinnillutik paasivaat. Paasinarsivorli aamma suliffeqarfiup aningaasaqarnera siunissami aamma ajornartorsiorfiussasoq, ilaatigut KNI-p naatsorsutaasa torersaavigineqarneranni suliffeqarfiup aningaasaqarnerata allarluinnaanera pissutigalugu aammali nunaqarfinniit illoqarfinniillu mikinerniit illoqarfinnut anginernut nutsertoqarnera pissutigalugu, tamannalu ingerlatseqatigiiffiup nioqquteqarnermik ingerlatsiviani assut ajornartorsiutaavoq. Taamaattumik ingerlatseqatigiiffimmut siunissami atugassarititaasut qanoq qulakkeerinniffigisinnaanerivut piffissami aggersumi piginnittutsinnut oqaloqatigiissutiginiarparput."

Ukiup affaata ingerlanerani KNI kingumut siumullu isiginiarsimavoq. Kingumut qiviaraanni naatsorsuusereriaatsimi sulinermilu atugassarititaasuni torersaasoqarsimavoq. Siunissaq eqqarsaatigalugu ingerlatseqatigiiffup inuiaqatigiinni suliassani ullutsinnut naleqqunnerusumik eqaannerusumillu ingerlatissagai KNI-mi suliarineqarnikuuvoq.

KNI A/S-imi pisortaaneq Jeppe Jensen: ”Allannguiniarnermik ingerlatsinitsinni alloriarneq siulleq tassaavoq aningaasaqarnikkut paasiuminartumik ingerlatsinissamik kiisalu sulinermi atugassarititaasut pitsaanerunissaannik suliaqarneq. Alloriarfissarput tulleq tassaassaaq annertuumik digitaliunerusumik ingerlatsinerunissaq kiisalu suliffeqarfiup suleriaasiinik annertunerusumik eqqummaariffiginninneq. KNI-p siunissaa inuiaqatigiit pisariaqartitaasa allanngoriartortut eqquutsinnissaannik tunngaveqarluinnarpoq, taamaattumik qanoq aaqqiissuteqartarnissarput eqqarsaatigilluartassavarput suliassallu suli sunniuteqarluarnerusumik aaqqiivigisarnissaat sulissutigissallutigu. .”

Ukiup affaanut nalunaarut KNI-p nittartagaani, www.kni.gl-imi atuarneqarsinnaavoq.