Tunniusimalluinnartumik sulinermini ’Jonathan Prisen’-imik kajumissaaserneqarpoq

KNI A/S-imi HRD-konsulenti, Najaaraq Thorin, ullumi ’Jonathan Prisen’-imik kajumissaaserneqarpoq.

Jonathan Motzfeldt-ip aningaasaateqarfiata ”Jonathan Prisen” tunniuteqqammerpaa. Najaaraq HRD-mi siunnersortitut KNI-mi oktobarimi 2018-imi sulilerpoq, kiisalu 2019-imi ukiakkut suliassani ilallugit KNI-p inuiaqatigiinni akisussaaqataanera pillugu suliniutinut akisussaasunngorluni.

Kajumissaammik tunniussineq KNI-p Sisimiuni Kiffartuussiviani ingerlanneqarpoq. Najaaqqap ilaqutai Sisimiunilu KNI-p sulisui aggersarneqarsimapput.

- Ulloq tupinnaqaaq tulluusimaarnaqaarlu. Kajumissaaserneqarneq pisussaaffiliivoq, siunissamut aammali sulininni. Kajumissaaq eqqaamajuaannarumaarpara suliassannut ajunngitsorpassuarnut, Najaaraq Thorin nuannaaqisoq oqarpoq.

Najaaraq nunat assigiinngitsut akornanni niuernermi nittarsaassinermilu professionsbacheloritut University College Nordjyllandimiit allagartarpoq, ukiorlu kingulleq KNI A/S-imi aamma CSR-manager-inngorluni.

Najaaqqap piffissap sivikitsup iluani ineriartortitseqataaffigisaasa ilagaat KNI-p iluani Aqutsisunngorniarneq nutaaq, sulisut piginnaasaannik ineriartortitsineq suliffeqarfiullu nuannersumik avatangiiseqarnissaa. Najaaraq inuttut aamma inussiarnersuullunilu qungujulaartuuvoq, inoqatiminik immikkoortitsinngitsoq isumassarsiorfigilluarneqarsinnaasoq, allamiullu oqaasiinut kakkattuulluni. Taakku saniatigut alapernaatsuuvoq uteriissuserlu pigalugu, taakkulu pigissallugit pingaartuupput nunarsuatsinni ineriartorfiupiloortumi.

- Ataqqinarluarpoq aamma Najaaraq suliffeqarfinni angisuuni sulisunut aqutsisunngorniarnerup iluani angusaqarluartarmat, tamannalu inuiaqatigiinnut kalaallinut iluaqutaassaaq, Jonathan Motzfeldip aningaasaateqarfiani siulersuisut ilaatigut taama allapput.
Jonathan Motzfeldtip Aningaasaateqarfiani siulersuisut ulloq 26. februaari 2015 ataatsimiinnerminni pilersippaat ”Jonathan Prisen”, taannalu inuusuttuunerusunut immikkuullarissumik iliuuseqarsimasunut immikkuullarilluinnartumilluunniit piginnasalinnut tunniunneqartarpoq.

Jonathan Motzfeldtip Aningaasaateqarfiata pilersinneqarneranut atatillugu Juntaap nammineq oqarneratut nersornaasiineq tigusisumut kajumissaarutaassaaq.

”Jonathan Prisen”KNI A/S-imi Sisimiuni ukioq manna tunniunneqarpoq, Najaaraq Thorin allagartamik nersornaammik 50.000 kr.-nillu tunineqarluni.

Talerperlermiit: Marie, Najaaqqap arnaa, Najaaraq, Angutimmarik Najaaqqap uissaa, Angutimmariullu arnaa Johanne Lange. Meeqqat tassa Najaaqqap Angutimmariullu marluliaataat Avaruna aamma Qivioq.

Jonathan Motzfeldt-ip Aningaasaateqarfiata siulittaasua Karen Motzfeldt oqalungiareermat Najaararlu qujassuteqareermat KNI A/S-ip pisortaanerata KNI-mi sulisut tamaasa sinnerlugit aningaasaateqarfim-mi siulersuisut qutsavigai, Nunatsinni suliffeqarfippassuit akornanni KNI A/S aamma inuusuttunik piumassusilinnik tunuarsimaanngittunillu sulisorpassuaqarnera maluginiarsimammassuk.