Taqqissuut-ip iluani angusat imaannaanngitsut

Pre-MBA hold II. Saamerlerniit Mathias Dahl (Qeqqata Kommunia), Arne Lyberth Petersen (KNI A/S), Malene Christensen (GrønlandsBanken), Nukannguaq Olsen (KNI A/S), Kista Kreutzmann (KNI A/S), Githa Brask Olsen (KNI A/S), Lars Andersen (KNI A/S), Elisabeth Banemann (Qeqqata Kommunia) aamma Jonas Aronsen (KNI A/S). Assimi peqataanngillat Lasse Spotteck (Greenland Holdning A/S), Karin Thorsen (Greenland Venture A/S) aamma Per Buhl Olsen (Greenland Venture A/S).

Sisamanngornerup ualigaa 29. august 2019 Sisimiuni KNI A/S-ip Kiffartuussiviata Nerisarfiani Taqqissuut-ip iluani angusat kusanartut nuannaarutigineqarlutik allagartartaartitsineq ingerlanneqarpoq.

Ullormi tassanerpiaq Pre-MBA Hold II-mi ilinniartut 12-it angusarissaarluaqalutik soraarummeerneranni Business Institute-mi aqutsisoq Lars Ib-ip ilinniarnermi uppernarsaatit soraarummeertunut tulluusimaaqisunut tunniuppai. Soraarummeertut Nuummeersut pingasut naggataarnersiornermi peqataanngillat.

KNI-p nerisarfiani kalaalimerngit assigiinngitsut kaagillu mamarunarsaarluakkat nerrivimmi piareersimatinneqarput.

Naggataarnersiorneq aallarnerneqarpoq MBA-mi angusarissaarluaqalutik soraarummeersimasut KNI A/S-imi pisortaaneq Peter Grønvold Samuelsen aamma Qarasaasiaqarnermut pisortaq Anders Gregers Ratzow ersaattaaffiulluartumik Nerisarfimmut isermata.

Business Institute-mi aqutsisoq Lars Ib tikilluaqqusivoq angusarissaarluarsimasunullu pilluaqquseriarluni ilinniakkap isumaa qanorlu pingaaruteqartiginera nassuiaatigalugu.

Pre-MBA naammassisut tulleriiaarlutik Nerisarfimmut isermata nuannaarutigineqangaarlutik tulluusimaarutigineqarlutillu suleqatiminnit ilaquttaminnillu ersaattaaffigineqarput.

KNI A/S-ip pisortaanera Peter Grønvold Samuelsen oqalungiarpoq, Lars Ib aamma Business Institute qutsavigalugu. Ukiuni kingullerni tallimani KNI A/S-imi aqutsisunik sulisunillu piginnaanngorsaanermik suliniutit Taqqissuut aallaavigalugu aallartisarneqarlutillu ingerlanneqareersut tigussaasumik kinguneqartitilerneri nuannaarutiginerarpai. Anders Gregers Ratzow peqatigalugu MBA-mik naammassinnissimanertik oqaluttuarivaa, KNI A/S-ilu qutsavigalugu ilinniakkamik taama qaffasitsigisumik periarfississimammatik, maannalu marluullutik neriorsuutigigitsik ilinniarsimasatik atorlugit KNI-mut “utertitsisussanngorlutik” misigisimallutik.

KNI-mi pisortaanerup naggataatigut Pre-MBA-mik naammassinnittut pilluaqquai tulluusimaarnarnerarlugit, kiisalu suliffeqarfiit allat Pre-MBA-mi Sisimiuni ingerlanneqartartumi peqataatitsisartut qujassuteqarfigalugit, suut tamarmik Nuummi pisariaqanngimmata. Tamatumunnga ilanngullugu Sisimiuni suliffeqarfinnut Qeqqatalu Kommunianut aammaarluni eqqarsaatigilluaqquaa peqataatitsisarnertik annertusiteqqullugu, anguniakkat oqaluinnarluni anguneqarsinnaanngitsut unnerlugu.
Oqaaseqartoqareermat Business Institute-mi aqutsisoq Lars Ib-iup Pre-MBA-mut naammassisut ilinniakkamut uppernarsaatissaannik tulleriiaarlugit agguaappai.

Pre-MBA-p aallartinnera isumaalu

KNI A/S aamma Business Institute suleqatigiillutik suliffeqarfinnillu allanik peqataatitsillutik Pre-MBA-mik ilinniarneq 2018-imi siullermik aallartippoq. Maannalu aappassaanik ilinniakkamut naammassinnittoqarpoq, siorna siulliit aggustimi naammassimmata.
Pre-MBA kimulluunniit aqutsinermik misilittagalimmut aqutsinermilu atugassaminik annertusaanissaminik kissaateqartumut sammivoq.

Ilinniartitaaneq atuagarsornikkut ilisimasarialinnillu atuagarsuutiginninnikkut qaffasissumik ingerlatsiviusussaammat ilinniartitaanerup naammassinissaa siunertaralugu inuttut imminut annertuumik piumaffiginissamik piumasaqaatitaqarpoq.

Ilinniarneq modulinut pingasunut aggugaavoq. Ilinniarnerup ingerlanerani allattariarsornermik suliassat pingasut qupperneqqortusiartortut tunniunneqarlutik, oqaluttariarsornermilu misilitsinnerit marluullutik. Pre-MBA-mi ilinniarnermi moduli siulleq ingerlanneqarpoq februar 2019-imi, ullut sisamat pikkunartumik ilinniarneq ingerlanneqarluni. Modulit aappaat aprilip aallartinnerani ingerlanneqarpoq, kingullerlu junimi ingerlanneqarluni.

Ukiup siulliup affaata ingerlanerani modulit pingasuusut tamarmik, misilitsinnerit marluk allagartartaartitsinerlu KNI-p Kiffartuussiviata atuartitsiviani Taqqissuummi ingerlanneqarput.
Peqataasut 13-iusut KNI-minngaanneersuinnaanngillat, aammali suliffeqarfinnit allanit illoqarfinniillu assigiinngitsunit aggerfeqarput.

KNI A/S-ip pisortaanera Peter Grønvold Samuelsen-ip PreMBA-mut naammassisut oqaaseqarfigai pilluaqqullugillu.

Naggataarnersiorneq aallarnerneqarpoq MBA-mi angusarissaarluaqalutik soraarummeersimasut KNI A/S-imi pisortaaneq Peter Grønvold Samuelsen aamma Qarasaasiaqarnermut pisortaq Anders Gregers Ratzow ersaattaaffiulluartumik Nerisarfimmut isermata.