Sisorallammak piukkunnaatilik KNI A/S-imit tunissuteqarfigineqarpoq

Asseq 02: KNI A/S-ip pisortaanerata Peter Grønvold Samuelsen-ip KNI A/S sinnerlugu Sasja Henriksen Joelsen tunissuteqarfigaa. Sasjap arnaa Mette Henriksen assiliseqataavoq. (ass/foto: Johannes Ujo Müller - KNI A/S)

12-inik ukiulik SSP-mi sisorartartoq Sasja Henriksen Joelsen timersuummut pimoorussinera KNI A/Simit
malugineqarpoq tunissuteqarfigineqarlunilu.

Sasja ukiut marluk matuma siorna sisorartalerluni aallartissimavoq, piffissallu sivikitsup ingerlanerani
pikkorilluinnalersimasoq sungiusaasuniit maluginiarneqalerluni. Soorlu ukioq Nunatsinni pissartanngorniuttoqarmat ukioqatigiiaani 20-ni guldit marluk sølvilu ataaseq pissarsiarisimavai, DMertoqarmallu, Danmarksmesterskab, sølvinnassimalluni.

Sasja meeraq qiimasoq ajugaarusussuseqartorlu qatanngutigiinni sisamaasuni nukarliup tulliuvoq.

Maanna ukiuunerani sisorarneq Sasjap nuannersisikkaluaannarlugu upernalermat, apummilu sisorarsinnaajunnaarami aasakkut periarfissanik allanik ujartuilersimavoq. Isumassarsigami anaanani aperaa sisoraatinik aqqusinikkoorutinik, rulleski-nik, sisorartalersinnaanerluni.

- Arpanneq nuannarilluaqimmagu sinnattuaqinera aamma piviusunngortikkusullugu uninnginniassammat
aasaanerani arpaatinik sinnattuaqillattaalermat misissuilluta aallartippugut. Qinigassat
amerlangaarmata nalornileriarama siunnersuisinnaasunik ikiortissarsiorlunga apersueqattaarsimavunga,
oqarpoq Sasjap arnaa Mette Henriksen.

Paasinarsivoq Mettep siunnersuisussanik apersuisaqattaarsimanera kinguneqarluarsimasoq. Naatsorsuutiginngisaminimmi pisoqarpoq.

KNI A/S tunissuteqarpoq
Suliffeqarfissuup KNI A/S-ip timersornerup iluani pikkorissunik ineriartortunik tapersersuisarnermigut
Sasja aasaagaluartoq suli sisorartarnini ingerlatiinnarusukkaa paasisimavaa.

Tamanna tunngavigalugu Sasja Henriksen Joelsen KNI A/S-ip kiffartuussivianut aggersarneqarpoq
nuannaarutigingaakkaminillu tunisilluni. KNI A/S-ip pisortaanerata Peter Grønvold Samuelsen-ip
poortukkat pingasut tunniuppai. Ammagaalu tassaapput sisoraatit aqqusinikkoorutit (rulleski) assigiinngitsut
marluk, siulliit sukuutserluni atugassat aappaalu klassiskimik, kiisalu kamippattassai.

Sasja Henriksen Joelsen qungujulaaqisoq tunissutisiani nuannarai misilerarnissaalu qilanaaralugit.

- Rulleski kissaatigimmagit nammineerluni nalunngilara siunertaqarluni qinnuigigaanga. Aasaaneranilu
atorluarnissai naatorsuutigeqaara, nuannarilluaqimmagumi arpanneq. Tamassinnullu qujanarujussuaq
timersoqatigisartagai nuannaartorisai nuannaarisaalu maligassiuilluarnissinnut tapersersortinullu
tuppallernaqisumik qujanarujussuaq, Mette Henriksen oqarpoq.

Aqaguani ilikkarpai
Sasja sisoraatit aqqusinikkoorutit pitaarigamigit unnukkuani eqqaminni misilippai.

- Pitaarigakkit unnukkut eqqatsinni aqqusinermi misilippakka. Isumaqarlunga nalunassasut nalunannginaarpakka.
Nuannareqaakka, iluaqaat. Aasaanerani SSP-eeqatikkalu sungiusaleraangatta
atortassavakka, aamma nammineq kisimiillunga, oqarpoq Sasja Henriksen Joelsen.

Ukioq KNI A/S-ip SSP-mi arpattartut meerartaasa sisoraatissaannik, ajaappiassaannik kamippassaannillu
qulinik tunissuteqarfigaattaaq.