Sulisutsialak 2019

KNI Katerinneq 2019 aallarnerfigalugu KNI A/S-imi Sulisutsialak-mik toqqaasarneq atuutsinneqalerpoq.

Sulisutsialaat pingasut 2019-imi toqqarneqartut ukuupput: Nanna Lynge Lennert, Kategori-chef blød non-food; Rosalia Korneliussen, Tiilerilaami niuertoq, kiisalu Jens Arkaluk Brandt, Qasigiannguani Ikummatissaasivilerisoq.

Suleqatitsialammik toqqaanissami makku isiginiarneqartassapput:

• Sulisoq suliffeqarfitta naleqartitaanik, piumasaqaataanik sulisutullu pisinnaatitaaffimminik  naammassinnittoq
• Sulisoq suliffimminik tulluusimaarutiginnittoq tunniusimasorlu
• Sulisoq suleqatigiinnermik nuannersunngortitseqataasoq
• Sulisoq unammillerusussuseqartoq, angusaqarusuttoq pilliuteqarusussuseqartorlu
• Sulisoq suliaminik ilungersuussilluartoq suliniuteqarluartorlu

Ataatsimut isigalugu sulisoq MALIGASSIUISOQ.

KNI A/S-ip pisortaanera Peter Grønvold Samuelsen Sulisutsialanngortut ilisaritippai, inassutigineqarnerini toqqammavilersuutaasut tigusiffigillattaarlugit. Pisortaanerup aamma ilisaritippai Sulisutsialannik siunnersuutigineqartunik nalilersueqatigiittartussat, tassaasut Pilersuisup pisortaa, Polaroil-ip pisortaa, kiisalu Sulisoqarnermut pisortaq.

Rosalie Korneliussen, Tiilerilaami niuertoq

Rosalie sulisuuvoq suliffeqarfitta naleqartitaanik, piumasaqaataanik sulisutullu pisinnaatitaaffimminik naammassinnittoq. Rosalie Korneliussen ukiuni pingasuni ilinniartuunikuuvoq Tasiilaq-mi taassuma kingorna Tiniteqilaaq-mut nunnikuulluni massakkulli Niuertutut ingerlalluni, Rosalie malinnaalluarpoq naleqartitanik sulisuminillu malinnaatitsineq assut pikkoriffigaa, sulisoq suliffimminik tulluusimaarutiginnittoq tunniusimasorlu.

Sulisoq suleqatigiinnermik nuannersunngortitseqataasoq. Rosalie inuk qiimasuuvoq suleqatiminillu qiimmassaasuulluni sullarissuuvoq taamaattumik suleqatiminit nuannarineqarpoq.

Sulisoq unammillerusussuseqartoq, angusaqarusuttoq pilliuteqarusussuseqartorlu Rosalie Niuertunngornerminiit ulloq manna tikillugu angusaqarusulluni suliassaminut tunniusimavoq paaserusuttaqarlunilu paasinninngikkaangami uteriisertarpoq paasinninnissami tungaanut. Missingersuutinik isertitassamaakkani uninngasuutinillu il.il. pillugit ilungersuuteqarpoq pitsaasumik ingerlatsinissaminut, assut ajuusaartarpoq isertissamaakkani angunngikkaangamigit.

Taamaattumik Rosalie Korniliussen uanga isinni inuk suleqatiminut maligassiuisuuvoq.

Jens Arkaluk Brandt, Qasigiannguani ikummatissaasivilerisoq

Jens Arkaluk KNI A/S-imi sulisut pitsaanerpaartaannut ilaavoq, pitsaanerpaajunngikkuni. Suleqatiminit Polaroil-imilu aqutsisunit tatigineqarluinnartuuvoq.

Inuk eqqissisimasuuvoq, nipaatsuuvoq imminullu sorsuakkiarisuunani. Taamaakkaluartoq suleqatiminut qaninnerusaminut qiimmassaqatigiissitsisinnaanermut tunuarsimaartuunani. Ikiuiumatulluinnartuuvoq aamma Qasigiannguani Pilersuisorluunniit eqqarsaatigalugu.

Jens Arkaluk aqutsisunit suliassanut Qasigiannguilluunniit avataaniikkaluartunut atorumasarpaat.

Qasigiannguani ikummatissaasivimmut takuniaasimasut nalunngilaat ikummatissaasivik qanoq torerluinnartigalunilu eqqiluilluinnartigisoq. KNI A/S-imi suliffeqarfissuarmi tamarmi Qasigiannguani ikummatissaasivik tassaavoq eqqiluinnerpaajullunilu torernerpaajusoq. Jens Arkaluk aalajaatsuuvoq suliffimminullu ilumoortuulluni.

Tunuarsimaartanngilaq suleqatiminik ilinniartitsinissaminut, suliaminut ineriartuutaasinnaasunut soqutiginnittuullunilu paasisaqarusuttuuvoq.

Jens Arkaluk taamaakkami maligassiuisuuvoq.

Nanna Lynge Lennert, Kategorichef, non food blød

Nanna KNI-mi sulivoq KNI-p iluaqutissaanik suliaqarluni, imminut iluaqusernissaq siunertarinagu.

Kalaallit inuunerat ilorleq aallaavigalugu nioqqutissanik ineriartortitsineq aalluppaa.

Pisiniarfinnik suleqateqarluinnartuuvoq pisiniartarneq nioqqutissanillu tunisaqartarneq eqqarsaatigalugu, soorlu februarimili 2019-ip ukiarnissaanut pilersaarutit naammassereernikuuai.

Ajugaajumassuseqartuuvoq, niuertutut eqqarsartoq. Missingersersuusiortarpoq piviusunngortinneqarnissaanillu qulakkeerinninniartuartuulluni.

Suleqatitsialaavoq qiimasoq, nuannaartoq, imminut tulluusimaarutiginnittutut qinngornilik, sulianilu naammassitinnagu angerlartanngitsoq.

Naapertuilluartuuvoq peqqissaartuullunilu.

Neriuppunga Nanna Suleqatitsialattut toqqarneqarumaartoq, tamannami kajumissaataassammat KNI-mi suliarujussua eqqarsaatigalugu.

 

Sulisutsialaat tamarmik immikkut Sulisutsialanngornerminni diplom-imik tunineqarput, saniatigul-lu aningaasanik DKK 5.000,-nik (akileraarut ilanngaatigereerlugu) kiisalu savissuarnik Victorinox-imeersunik tunineqarput.

 

 

KNI-mi sulisut Katerinnermi peqataasut ataqqinartorsuup Dronning Margrethe-p aappaata nersornaasiuttagaanik Fortjenstmedalje sølviusumik saqqarmiumaartut.