Rudolf Kleemann (Ruula) Fortjenstmedalje-mik sølv-iusumik saqqarmiulerneqarpoq

Ruula qatanngutinilu.

Ullumikkut 10. januar 2019 Upernavimmi suleqaterput Ruula, Rudolf Kleemann, KNI Pilersuisup umiarsualiviani ukiunilu kingullerni quersuaani ukiorpassuarni sulisuusoq ataqqinartorsuup Dronning Margrethe II-p nersornaasiuttagaanik Fortjenstmedalje-mik sølv-iusumik saqqarmiulerneqarpoq.

Ruula 1978-imi februarip aallaqqaataani sulileqqaarsimavoq umiarsualivimmi ikiortitut, ukiorlu taanna ukiaani quersuarmi sulilivissimalluni, maannamullu suli quersuarmi assistentitut atorfeqarluni.

Saqqarmiuliisuuvoq KNI A/S-imi sulisoqarnermut pisortaq Mikol Poulsen. Mikol ilaatigut ima oqaaseqarpoq:

Asasarput suleqaterput Rudolf Kleemann, Ruula, nalunngilara saqqarmiulerneqarnissannut innersuunneqalerninniilli angajoqqaatit uaniitikkitit, maanna aamma qularinngilara qamaniisikkitit. Qujanartumillu qatanngutitit ilaallu maanna najuussinnaasut ilagaagut pingaartorsioqatigalutalu.
Nipituuliortuunngilatit, aamma nammineq malugaara ilumoortoq. Nipaatsumik suleriuseqaraluarlutit suliat eqqortumik suliarineqarnissaat pingaartitarivatit, ippigisaqartillutillu oqaatigisarpatit.

Suliartortuaannarputit suliffissakkut, allaallu sulinngiffeqaraluarlutik akunnattoorfinni saaffigineqartillutit pisinnaajuaannarputit, tassuuna suliffinnut tunniusimanerit naatsorsuutigineqartuaannarsinnaanerillu ersersippat. Akisussaaqataallutit sulinerit ingerlappat, quersuarmiinnaanngitsoq aamma pisiniarfimmit pisariaqartitsisoqartillugu.

Ruula, suliffeqarfitsinni tunniusimallutit ukiorpassuit sulisimaninni taamatullu innuttaaqataalluartuunerit pillugu nersorniarlutit Ataqqinartorsuup ilinnut saqqarmiuliuteqqusaa sakissannut ikkutissavara.

 Rudolf Kleemann.

 Rudolf Kleemann aamma KNI A/S-imi sulisoqarnermut pisortaq Mikol Poulsen.