Royal Arctic Line A/S KNI-mit naammagiinnarneqarsinnaajunnaarpoq

April qaammat aallarnerfigalugu KNI-imut sineriammilu ingerlatarpassuinut nassiussanut tunngatillugu pissutsit akuersaarnanngilluinnartut aqqusaarneqarsimapput. Aprilimili Royal Arctic Line ajuusaaqattaalerpoq, paaseqqullunilu nasiussalereriaatsiminik allannguinerit pisariaqartut kukkuluttorfigineqaqattaarneri junimi qaangiukkumaartut. Kingorna oqarput, juli-migooq qaangiutissapput. Kiisa oqarput, augustimi suut tamarmik pitsaanerulissapput. Maanna RAL-imit nassuerutigineqarpoq nassiussalerinermi ajornartorsiutitik aatsaat 2018-imi pitsaanerulersissinnaallugit.

Tamanna ajorluinnarpoq, uagullu naammagittaannarsinnaajunnaarpugut.

"Nassiussat kukkusumik ingerlanneqarlutillu passunneqaqattaarneri uagut sulisutsinnut assut suliaqutaalerput, kukkunerit iluarsiniarneqarnerini, sillimmasiisarfinnut saaffiginneqattaarnerit, nioqqutissat asiusut igiinnartariaqalersimasullu taartissaannik piniarnerit, kaaviiaartitassaraluanillu annaasaqarnerit eqqarsaatigalugit. Tamakku KNI-mi sulisutsinnut assut ilungersunartorsiortitsipput, taakkuuppummi pisisartunit naammagittaalliorfigineqartuartut nassiussat RAL-imit kukkusumik pineqarsimagaangata. Pissutsit iluarsiniarlugit neriorsuuterpassuit RAL-imit nalunaarutigineqaqattaarput, ajoraluartumilli uagut pitsanngoriaatinik tamakkuninnga malugisaqarsinnaanngilagut, ajorpoq, ajorluinnarpoq, naammagittarnerpullu tamaanga killilertariaqarparput." KNI-p pisortaanera Peter Grønvold Samuelsen taama oqaaseqarpoq.

Peter Grønvold Samuelsen nangilluni oqaluttuarpoq: "Piffissami sivittortumi RAL periarfississimavarput eqqissilluni ajornartorsiutiminik aaqqiiniarnissaanut, akornusersorumasimanngilarpullu, peqatigaluguli kukkuluttuuterpassuit atuisunut annikinnerpaamik kingunerluuteqarnissaat qulakkeerniartuarsimallutigu. Septemberilli qaammataani aatsaat taama kukkuluttuutit KNI-mut sineriammilu ingerlatarpassuit ilungersunartigisut kukkunerillu angitigisut amerleriarujussuarput. Oktoberillu qaammataa imaaliinnaraluartoq kukkuluttuutinit amerlaqisunit eqqorneqareerpugut. KNI-p nioqqutissanik pilersuisussaatitaanera matumani innarlerneqarpoq Namminersorlutillu Oqartussanut inuussutissanik pilersuisussaatitaanerput tamatigut eqqortissinnaajunnaarparput. Tamannalu nipangiinnarluta akuerisinnaanngilluinnarparput."

Septemberip qaammataani kukkuluttuutit KNI-mit paasineqarput, taakku tassaapput nassiussat 130-it sumiiffiillu 25-it eqqorneqarput.

Kukkuluttuutit ilaatigut takusagut tassaapput Kitaaniit Tasiilamut nassiussat Aalborg aqqusaarlugu tassanilu ataatsimut poortorlugit. Kisianni taakku 40" containerimut poortorneqartut umiarsuarmut Tasiilaliartumut ikineqarsimanngillat.

Kangaatsiamut immiaaqqat sodavandillu nassiunneqartut qeritillugit nassiunneqarsimapput.

Nassiussat Upernaviup eqqaani Tasiusaq-mukartut Uummannamut nassiunneqarsimapput.

Neqimiit nassiussat qerisut qerisutuunngitsoq ingerlanneqarsimasarput.

Kukkunerpassuit ilaatigut ima ittut nalaappagut:

-          Nioqqutissat nillertumiittussaanngikkaluartut qerisutut nassiunneqartarsimapput.

-          Containerit qerititsiviungaluartut qaminneqartarsimapput.

-          Containerit nassiussallu allat piffissami sivisoorsuarmi tammaaneqartarsimapput.

-          Nassiussat nunaqarfinnut kukkusumik apuunneqartarput, apuunneqaraangamillu sap. ak. marlunnik kingoqqutsillutik apuunneqartarlutik.

-          Nassiussat Aalborg-imi puiguinnakkat amerlaqaat.

-          RAL-ip pilersaarutaanut tunniussinissamullu killissarititaasunik sulisut ilisimanninngitsut.

-          Nassiussaleriviit matuneqaannartartut ulapaarnerarlutik.

-          Nassiussat silami uleqartitaanatik sialummit anorimillu aserorterneqartut.

Tamakku qaavisigut umiarsuit ajutoortut amerlapput, taarserneqaraangamillu taarserneqartarlutik usisinnaanikinnerusunik Nunatsinnilu nunaqarfippassuarnut naleqqutinngitsunik. Taamaattoqartillugu nunaqarfinni usingiarniartarnerit sivittortarput, tamatumanilu KNI sulisuilu eqqorneqartarput, KNI-mut aningaasar-tuutaanerulersitsisartumik, sulisunillu sulerulutsitsinermik malitseqartartumik.

Nassiussalerinermi kukkuluttuuterpassuit pimoorullugit eqaatsumik iluarsiniarnerqartarneri RAL-imi tammarluinnarput – akineqaannartalerpugut, tulliani periarfissaqalerpat apuunniarneqarumaarnerarlugit.

Ukiussamut pilersuineq

"Ukiulerpoq, avannaani tunumilu sumiiffiit imaatigut tikinneqarsinnaajunnaalereerput. Piffissami matumani nioqqutissat tamakkununngaanneqartussat inniminnerneqartitereerlutillu nassiussuunneqarput. Inoqarfiit ilarpassui qaammatini 6-7-ni tulliuttuni umiarsuaqarsinnaaneq ajorput, taamaattumillu ukiuunerani inuussutissat pingaarutillit quinut ittujaartorneqartarput. Nioqqutissat pisariaqartinneqartut apuunneqarsimassanngippata taava KNI-p pilersuisussaatitaanini naammassisinnaajunnaassavaa, qaavatigullu oqartariaqarpugut, tamanna atuisartunut eqqortuusinnaanngilluinnartoq." KNI-p pisortaanera Peter Grønvold Samuelsen oqarpoq.

Peter Grønvold Samuelsen naggasiullugu oqarpoq: "Nassiussat kukkusumik pineqarnerisa qaavatigut allarpassuarnik RAL-ip tungaanut unamminartorsiortinneqarpugut. Nassiussat eqqortumik uppernarsaasersorneqanngillat, tamannalu piffissarujussuarmik atuiffigivarput. Akiligassat ilumut eqqortuunersut, ilumut nioqqutissat faktura-ni pineqartut apuuffissaminnut akornuteqanngitsumik apuussimanersut uppernarsiniarlugu piffissarujussuarmik atuivugut. Akiligassat eqqunngitsorpassuit nalaassimavagut. Akiligassat KNI-mut attuumassuteqanngitsorpassuit KNI-mut nassiunneqartarsimapput. Ilami allaat akiligassat KNI-mut attuumassuteqanngilluinnartut KNI-mut akiligassanngorlugit ernialersorneqalersimapput. Paatsiveqanngitsumik kiffartuunneqarpugut, tamannalu KNI-mut akisoqaaq pisisartutsinnillu kiffartuussinissamut piffissaq atugassaraluarput annikillisinneqartarpoq."