Pilersuisoq pisortartaarpoq

KNI A/S-ip Pilersuisumi 64-nik pisiniarfiuteqartumi 600-nillu sulisoqartumi pisortatut atorfinitsippaa Brian Weuge Chemnitz (48).

Brian Weuge Chemnitz atorfimmini ingerlaannartumik aallartissaaq 1. juni 2020.

Brian Weuge Chemnitz Nunatsinni pisiniarfinnik ingerlatsinermi ukiut 20-it sinnerlugit misilittagaqarpoq. Ukiup aaffaa avillugu KNI A/S-imi indkøbschef-itut atorfeqarpoq, Nunatsinnilu illoqarfinni arlalinni Pisiffimmi Brugseni-milu assigiinngitsunik atorfeqartarsimalluni.

Pilersuisumi pisortatut atorfik inuttassarsiuuttariaqalernikuuvoq pisortaq Niels Andersen februar 2020-imi tassanngaannartumik toqukkut qimagummat.

KNI A/S-ip pisortaanera Peter Grønvold Samuelsen oqarpoq:
“Brian Weuge Chemnitz qinerparput, atorfiup imarisaanut unammilligassartaanullu piukkunnarnerpaanik piginnaaneqarmat, misilittagaqarmat, sakkussaqarmat.

Inuianuiaqatigiinnut kalaallinut paasisimasaqarnera ataqqinninneralu nalilersuinitsinni pingaarutilimmik isumaqartissimavagut. Pilersuisoq maannamut killiffianit suli ineriartorteqqissavarput.

KNI-p nioqqutissanik pilersuisussaatitaanerata isumaginiarnera arlalippassuartigut tatineqarpoq, ingammillu inoqarfiit Pilersuisumik pisiniarfeqarfigisatta inuerukkaluttuinnarnerannik pissuteqartumik. Tamatuma kingunerisaanik Pilersuisumi kaaviiaartitat isertitallu appariartulertussaapput; sinneqartoorluarnissarlu kisimi aqqutissaavoq atortut pigineqartut nalitsinnut naapertuuttunngorlugit nutartertuarneqassappata. Pissutsit taamaaliartornerat naleqqussarfigiuartariaqarparput aammattaarli periarfissanik nutaanik misiligaajuarnissaq tunuarsimaarfigiunnaartariaqarparput.”

Pilersuisup pisortartaava Brian Weuge Chemnitz, Pilersuisoq, ima oqaaseqarpoq:

”Qilanaareqalugu naatsorsuuteqarfigeqalugulu Pilersuisumi pisortanngortussanngorpunga piffissaq pissanganarluinnartoq eqqorlugu; tassami suliffeqarfik unammilligassarpassuaqarpoq, pisisartunullu sulisunullu iluaqutaasumik Pilersuisoq ineriartorteqqissavarput.

Kalaallit Nunaata annerpaartaani sulisut pikkorissut sulilluartullu suleqatigilernissaat qilanaarivara, ullut tamaasa sineriassuaq tamakkerlugu pisiniarfinni peqqumaasivinnilu sulisut.” Brian Weuge Chemnitz oqarpoq.

Peter Grønvold Samuelsen
Adm. direktør
KNI A/S