Peter Grønvold Samuelsen 60-inik ukioqalerpoq

KNI-mi pisortaaneq Peter Grønvold Samuelsen ippassaq 23. oktober 2020 60-inik ukioqalerluni inuuissiorpoq, tamannalu KNI-p Kiffartuussiviani malunnartinneqarpoq.

Piitap inuuianut atatillugu Kiffartuussivimmi suleqatai Nerisarfimmi ippassaq pisortaanertik nalliuttorsiutiginiarlugu katersuupput.

KNI-mi siulersuisut siulittaasuat Lars Borris Pedersen nalliuttorsiornermut najuukkiartorluni tikinnikuuvoq, tikilluaqqusillunilu Piitaq oqalugiarfigaa, ilaatigut imatut oqarluni:
- Asasara Peter. KNI-mi siulersuisut sinnerlugit 60-iliininni pilluaqqujumavakkit. KNI-mi siulersuisut pisortaanermik naammagisimaarinnilluinnarnerat isertuunneqanngilaq. KNI tassaavoq Nunatsinni inuiaqatigiinni pingaaruteqarluinnartumik inissisimasoq. Suliffeqarfik taama angitigisumik akisussaaffeqartoq, Nunatsinni sumiiffinni 70-it sinnerlugit ittoq 1.000-illu missaanni sulisoqartoq ataatsimoortinneqassaaq inummik nukittuumik siuttuuffigineqarluni, takorluugaqarsinnaasumik paasinnittumillu. Oqartariaqarpugullu pikkoriffissat tamakku tamaasa illit pikkoriffigigitit.

Lars Borris Pedersen oqalugiarpoq.

Larsip Piitaq siulersuisut sinnerlugit dronimik tunissuteqarfigaa.

Piitaq qujassuteqarniarluni aamma oqaaseqalaarpoq:
- Larsi oqaatsinut qujanarujussuaq. Suliffeqarfik patajaallisarluarniarlugu nutaanik anguniagaqartuarpugut
pikkorinnerulerumalluta nukittorsartuarniarlutalu. Pisiniartartugut pillugit pitsaanerpaamik anguniagaqarpugut. Tamassinnut qujanarujussuaq, nuliara Najannguaq aamma qujassutissaqarfigilluarpara, taassumammi suliartoraangama, angalagaangama angerlaraangamalu tapersersortuarmanga.

Piitap nuliani Najannguaq aamma qutsavigaa.

Piitap oqaaseqareernerata kingorna HRD manageri Dorthea KM Isaksen KNI-mi sulisut sinnerlugit Piitamut tunissuteqarpoq oqalugiarlunilu:
- Asasarput Pisortaanerput Peter. KNI-mi siulersuisuni suliffeqarfissuup sinniisaatut maanna suleqatikka tamaasa sinnerlugit maani nikorfavunga ullorsiorninni pilluaqqorusullutit – KNI-mi suleqatigiit tamarmik sinnerlugit 60-inik ukioqalerninni ilaquttatillu pilluangaaritsi. Ulloq qilanaarisat aammalumi uagut qilanaarisarput nallerpoq. Neriuppugut ulloq nuannersumik eqqaamasassatut atorumaarit. Ukiut arfineq marlunngulersut matuma siorna ilinnit tunissutisiaraarput toqqissisimaneq, naligiinneq, naleqartinneqarneq, suliffeqarfik orniginartoq, ineriartorfiusorlu, qujavugullu suli ullumikkut tunissut pigigatsigu. 60-iliinerillu iluatsillugu suleqatigiit tamatta qujangaarpugut suliffimmi nuannersumi siuttuullutit inissisimagavit.  Aajunalu poortugannguaq ammagassat – eqqissisimaartarfinni illuaqqanniititassatut suleqatigiit piukkussaat. Pilluangaarit ullullu sinnera atorluariuk.

Dorthea oqalugiarpoq.

Piitaq Qasigiannguarmiuummat KNI-mi sulisut Qasigiannguit assianik kusanartumik tunissuteqarfigissallugu tulluartissimavaat.

Sulisunit tamanit tunissut.

Oqalugiartoqareermat sulisut tamarmik inuuissiortoq erinarsorfigaat, naggataagullu hurraartorfigalugu.

Taakku saniatigut Piitaq sulisunit immikkut aamma naasunik, atuakkamik sukkulaatinillu tunissuteqarfigineqarpoq.

KNI-mi sumiiffinni assigiinngitsuni pisortaanerup inuuianut atatillugu aamma kaffillertoqarpoq.

Kangerlussuarmi Pilersuisoq.

Qaanaami Pilersuisoq kaffillerpoq.

Arsummi Pilersuisoq aamma kaffillerpoq.

Ittorput Piitaq, angusannik qamannga pisumik pilluangaarit, neriuppugut ullorsiorluartutit :)