KNI A/S kajumissaasiivoq

Assiliisoq: Leiff Josefsen

Ukiut tamaasa KNI A/S kajumissaasiisarpoq DKK 5.000,-nik aningaasartalimmik Ilisimatusarfimmi bachelor-itut soraarummeertut akornanni agguaqatigiissillugu karakteriginnerpaamut. Tamannalu
aamma ullumi pivoq.

Ilinniagaqarneq inuiaqatigiit siumukarnerannut annertuumik sunniuteqarpoq, taamaattumillu ilinniagaqassutsip qaffassarneqarnissaa suliffeqarfitta tapersersortuaannarpaa.
Ullumi Ilisimatusarfimmi allagartartaartitsisoqarnerani KNI A/S-ip siulittaasua Lars Borris Pedersen kajumissaammik tunniussisuuvoq.

Ukioq manna KNI A/S-imit kajumissaaserneqarpoq Nivi Pedersen, bachelor-itut agguaqatigiissillugu qaffasinnerpaamik karakterinnattoq oqaatsinik, litteratur-imik tusagassiornermillu immikkoortortameerpoq.

Lars Borris Pedersen:
"Nuannaarutigaara – KNI A/S sinnerlugu – kajumissaat ilinnut ukioq manna Ilisimatusarfimmi bachelorinngorniat akornanni agguaqatigiissillugu karaktereqqortunerpaamut tunniussinnaagakku.

KNI A/S-imut ilinniartitaaneq pingaarutilerujussuuvoq. Ilinniagaqarneq siumukarnermut aqqutissaavoq. Inuiaqatigiinnilu atugarissaarnerulersitsisinnaavoq. Ilinniartitaaneq inuiaqatigiinni naleqarnerulersitsisarpoq, tamannalu tamatsinnut iluaqutaasussaavoq. Taamaappoq ilinniagaq sunaangaluarpalluunniit.

Kajumissaat KNI A/S-imiit tunniunneqartarpoq ilinniagaqartumut bachelorisut agguaqatigiissillugu qaffasinnerpaamik karakterilimmut. KNI A/S taamaaliortarpoq takutikkumagatsigu ilinniartoq
angusarissaartoq tapersersoripput. Tamaviaaraannilu angusarissaartoqarsinnaasoq. Taamaattumik nuannaarutigaara ullumikkut kajumissaat ilinnut, Nivi Pedersen, tunniussinnaagakku.

Angusarissaarninni pilluarit siunissamilu inuutissarsiuteqalernissarni ingerlalluarnissarnik kissaappatsigit."

Assiliisoq: Sofie Geisler