Ole Mathiassen allagartartaarpoq

Ole ilaquttanilu.

Suleqaterput Ole Mathiassen, akuerisatut innaallagisserisutut naammasseqqammersoq, ullumi pingasunngornermi 27. januar 2021 Teams aqqutigalugu Taqqissuumi allagartartaarpoq.

Innaallagisserisutut ilinniarsimasoq, Kiffartuussivimmi sanaartornermut immikkoortortami suleqaterput Ole Mathiassen nuannaarpaseqaaq tulluusimaarpasillunilu.

Tamannalu pissusissamisoorpoq.

Olemmi ilinniakkani akuerisatut innaallagisserisutut 20. januar naammassivaa, ilinniarnerlu taanna ukiuni marlunni sivisussuseqarpoq. Ilinniagaq pissarsiaqaataalluarsimavoq, aammali tamaviaarnarsimalluni.

Olep ilinniakkani e-learningitut tigunikuuaa, tassa ilinniarnermini piffissap ilaa onlinekkut atuartarpoq sanaartornermut immikkoortortaqarfitsinni suliffini tigummiinnarlugu.

Ole Professionshøjskolimi UCN-imi Aalborgimiittumi ilinniarpoq. Atuagarsorneq onlinekkut ingerlattarpaa. Ole Nuummut praktikkeriartornikuuvoq, Sisimiuni praktikkerfissarsinikuunnginnami.

Svenditut allagartartaarneq Aalborgimi ingerlanneqarpoq Teamsilu aqqutigalugu Taqqissuumi ullumikkut pingasunngornermi 27. januar toqqaannaq aallakaatinneqarluni. Tassani allagartartaartut 20-it, Ole ilanngullugu, nalliuttorsiutigineqarput.

Olep atuarfimmini UCN-imi ilinniakkaminik aqutsisua, Johan Mølgaard Jensen, oqalugiarpoq ilaatigullu imatut oqarluni:

”Tamassi pillukutsooritsi. Danmarkimi ilinniarfiit pitsaanerpaat ilaat naammassivarsi. Onlinekkut atuartitagut hold 3-t maanna naammassipput, inuiaqatigiinnilu ineriartortuartumi sakkussaqarlualerpusi. Ulapittarsimaqaasi, tamassilu tulluusimaarutigeqaassi. ”

Olep allagartartaarnera Taqqissuumi ingerlavoq, Teamsikkut toqqaannaq aallakaatinneqarluni.

KNI-mi pisortaaneq Peter Grønvold Samuelsen, aamma oqaaseqarpoq:
”Ole pilluangaarit aut. el-installatøritut ilinniagaq annertuumik piumasaqarfiusoq naammassilluarakku, ilinniagaq qaffasissoq KNI-mi atorfeqaatigalutit ingerlassimasat. Ilaquttatillu sinnerlusi, soorunami aamma KNI sinnerlugu tulluusimaarutigaassi. Nunatsinni ilinniarluarsimasunik pisariaqartitsisorujussuuvugut. Taamaammat assut qiimmaallannarpoq innaallagisserisutut ilinniakkat qaffassarakku ullumikkut imminut taasinnaanngorlutit aut. el-installatøritut. Innaallagisserisut elektrikerit amerlapput, ikittuinnaappulli aut. el-installatøritut ilinniarsimasut. Tamatuma takutippaa ilinniakkap taassuma nalinginnaasuunnginnera annertuumik piumasaqarfiummat.”

Peter Grønvold Samuelsen oqalugiarpoq.

Ole qujassuteqarluni aamma oqaaseqarpoq:

”Ilinniarnerma nalaani tapersuisut qutsavigerusuppakka. Ilisseqanngippat taamatut angusaqarsimassanngikkaluarpunga. Qujanarujussuaq angalasarnerma nalaani tapersersortuarassinga, KNI-mi sulisuunera tulluusimaarutigisorujussuaara.”

Ole KNI-mit savinnik puussaannillu kusanartumik tunisippoq, taamatullu tuttup quttoraa mikinngitsoq aamma tunissutisiaraa.

Olep aqutsisua, sanaartornermut immikkoortortami aqutsisoq, Nuka Kristiansen, kingulliulluni oqaaseqarpoq:

”Angusannik pilluarujussuarit. Uagut sanaartornermut immikkoortortamit nalunngilarput suliffimmik paarsiutigaluni ilinniarneq ilinnut qanoq nukersornartigisimanersoq. Suliffinni tuaviuussanik suliassaqartarsimavoq saniatigullu atuarfimmi tunniussassaqartarlutit. Sanaartornermut immikkoortortami suleqatit, Ole tapersersortarsimagassiuk qujanaq. KNI-mut HRD managerimullu Dorthea Isaksenimut aamma qujanaq. Ole suliffimmini ineriartornissaminut periarfissaqartitaanini KNI-p iluaqutigissavaa.”

Nuka Kristiansen oqalugiartoq.

Ole KNI-mit savinnik tunisippoq.

….tuttullu quttoraanik

Ole nulianilu.

Olep qanittumi, akuerisatut uppernarsaatini tigoriaruniuk, Nukissiorfimmiit akuerisaasumik suliassanik annertunerusunik tigusisinnaalissaaq, siullermik assersuutigalugu aserfallatsaaliinnarsinnaasaminik.

KNI-mi sulisut ilinniaqqinnissaminnut periarfissaqarluarnissaat KNI-mit pingaartinneqarpoq, KNI-mummi tamanna kisimi iluaqutaasussaanngilaq, inuiaqatigiinnulli tamanut iluaqutaasussaavoq.