Pilersuisoq pisortartaarpoq

KNI A/S-ip ataani pisiniarfinnik ingerlatsivik Pilersuisoq 66-nik pisiniarfiuteqartoq 600-illu angullugit sulisoqartoq pisortartaarpoq. Niels Andersen (39) Pilersuisumut pisortanngussaaq. 

Niels Andersen atorfittaamini aallartissaaq 1. maj 2017.

Niels Andersen ukioq kingulleq tikillugu Pisiffimmi pisiniartarnermut ussassaarinermullu pisortaa-simavoq, 2007-iillu Pisiffiup iluani assigiinngitsunik qaffasissumik atorfeqarsimalluni. Ukiut kingul-liit 24-it niuertarfinni niuernermik suliaqarsimavoq, ilaatigut Kvickly aamma ISO Supermarked DK-imi suliffigisimallugit.

Niels Andersen niuernermik ilinniarsimasuuvoq. Niuertarfinnut immikkut sammisumik Akademi-økonom-itut kiisalu aqutsineq pillugu HD-mik taaneqartartumik ilinniaqqissimasuulluni.

Niels-Andersen-1-150px.jpg 

Niels Andersen piffissami 2007-miit 2016 tikillugu Nunatsinni sulinermini Sisimiuni Nuummilu najugaqartarsimavoq.

KNI A/S-imi pisortaaneq Peter Grønvold Samuelsen, ima oqarpoq:

"Pilersuisumi pisortatut atorfik soqutiginilerujussuuvoq, qinnuteqartullu arlalissuusimallutik. Taamaakkaluartoq piukkunnarnersiuinitsinni nalorninaatsumik Niels Andersen qinerparput, atorfiup imarisaanut unammilligassartaanullu piukkunnarnerpaanik piginnaaneqarmat, misilittagaqarmat, sakkussaqarmat. Inuiaqatigiinnut kalaallinut paasisimasaqarnera ataqqinninneralu nalilersuinitsinni pingaarutilimmik isumaqartissimavagut. Pilersuisoq maannamut killiffianit suli ineriartorteqqissavarput.

KNI-p nioqqutissanik pilersuisussaatitaanerata isumaginiarnera arlalippassuartigut tatineqarpoq, ingammillu inoqarfiit Pilersuisumik pisiniarfeqarfigisatta inuerukkaluttuinnarnerannik pissuteqartumik. Tamatuma kingunerisaanik Pilersuisumi kaaviiaartitat isertitallu appariartulertussaapput; sinneqartoorluarnissarlu kisimi aqqutissaavoq atortut pigineqartut nalitsinnut naapertuuttunngorlugit nutartertuarneqassappata. Pissutsit taamaaliartornerat naleqqussarfigiuartariaqarparput aammattaarli periarfissanik nutaanik misiligaajuarnissaq tunuarsimaarfigiunnaartariaqarparput."

Pilersuisup pisortartaava Niels Andersen, Pilersuisoq, ima oqaaseqarpoq:

"Qilanaareqalugu naatsorsuuteqarfigeqalugulu Pilersuisumi pisortanngortussanngorpunga piffissaq pissanganarluinnartoq eqqorlugu; tassami suliffeqarfik unammilligassarpassuaqarpoq, pisisartunullu sulisunullu iluaqutaasumik Pilersuisoq ineriartorteqqissavarput.

Kalaallit Nunaata annerpaartaani sulisut pikkorissut sulilluartullu suleqatigilernissaat qilanaarivara, ullut tamaasa sineriassuaq tamakkerlugu pisiniarfinni peqqumaasivinnilu sulisut.

Uannut ilaquttannullu manna aamma isumaqarpoq, tassa Sisimiut siullermik angerlarsimaffigeqqaaratsigu ukiut qulerluinnaat qaangiupput, maannalu tassa uterfigeqqinnissaa qilanaarutigisorujussuuarput."  Niels Andersen oqarpoq.

Apriilip naanissaata tungaanut Pilersuisumi pisortaq Finn Fabricius siorna aasakkulli atorfimminit tunuarniuteqarnikuuvoq ilaquttanilu Danmarkimut nuuttussaanertik pissutigalugu, KNI-miilli kissaatigineqartutut soraarniuteqarnini aatsaat 2017-imi apriilip naanissaata tungaanut kinguartissimallugu.

”KNI A/S sinnerlugu Finn Fabricius Pilersuisumi sulilluarsimaneranut KNI-milu pisortaqatigiit pitsaasumik sulinerannut sunniuteqarluarsimaneranut qutsavigaara. Finn ilaqutaalu siunissami ajunnginnerpaamik kissaappakka.” Peter Grønvold Samuelsen naggasiivoq.

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl