Nuugaatsiarmiunut Illorsuarmiunullu tassaarsuarmit eqqugaasunut KNI ikiuiniarluni katersaminik agguaassissaaq

17-18. juni 2017 unnukkut/ullaassakkut pisut puigorallarnavianngilagut. Tassami aasaq Uummannap sulluani Nuugaatsiallu qanitaani qaqqap imaanut nakkaaneratigut tassaarsuaqartitsineranit Nuugaatsiaq piuneerunneqarpoq, kingunerisaanillu Nuugaatsiaq Illorsuillu inuerutinneqarput. Inuit qimarnunneqarput, maannalu Nunatsinni inoqarfinnut allanut siammartitersimalereerput.

Ajunaarnersuaqarnerata kinguninngua KNI-miit nalunaaruteqarnikuuvugut ikiuiniarnermut atatillugu peqataaniarluta, taamaaliorpugullu KNI-mi suleqatigut saaffigalugit aningaasanik atortunilluunniit/inuussutissanilluunniit tuniserusunnersut.

Suleqatigisatsinniit aningaasat DKK 205.500 pissarsiarivagut. KNI nammineq DKK 250.000-nit immikkoortippai. Taamaalilluni aningaasat katillugit DKK 455.500 ikiuiniarnermut pissarsiarineqarput.

Aningaasat saniasigut KNI-p suleqatigisaanit tunissutigineqarput qimminut nerukkaatissat, qaleralinnut qassutit, saviit, tujuulussuit, annoraat il.il. katillugit DKK 182.000-nik naleqartut.

Taamaalilluni ikiuiniarnermi katersat ataatsimut katillugit DKK 637.500 nalillit katersorneqarput.

Taakku qanoq iliorluni agguaanneqarnissaat pisortanik suleqateqarluni KNI-p maanna ilusilersimalerpaa.

KNI-p pisortaanera Peter Grønvold Samuelsen: ”Aasaq Nuugaatsiami pisimasoq amiilaarnaqaaq, nunaqqatigullu sakkortuumik eqqorneqarput, angerlarsimaffitsik inuussutissarsiutiminnilu tunngavigisatik annaagamikkit. Nuannaarutigaaralu eqqorneqarsimasunut annertoqqutaalaarsinnaasunik tunniussassaqalaaratta, allarpassuit assigalugit ikiuiniarnitsigut pissarsiarisimasatsinnik. Ingammik nuannaarutigaara KNI-mi suleqatigut paasinnillutik ikiuukkumasimammata, innuttaasut eqqorneqarsimasut maanna nunagisatik qimallugit inuunerminnik inuussutissarsiutiminnillu naqqaniit ingerlariaqqinnerminni tapertarilaarsinnaasaannik.”

Marlunngornermi 7. november 2017 Uummannami KNI katersaminik agguaassiniarpoq ilaqutariinnut 80-inut (inuit 170 miss. pineqarlutik) Nuugaatsiarmiuusimasut Illorsuarmiuusimasullu.

Uummannap avataanut nunassissimasut puigorneqanngillat, pisortallu suleqatigalugit taakku sumut nuussimaneri KNI-mit ilisimaneqarpoq, piffissamilu aggersumi attavigineqarumaarput pissaannillu pajunneqarumaarlutik.