Niuertunngorniat hold III naammassipput

KNI A/S-imi Niuertunngorniarlutik ilinniartut 12-it arfininngormat 21. april 2018 naammassipput.

Niuertunngorniat hold III-it arfininngormat 21. april, soraarummeeramik tamarmik angusipput. Taamaalilluni august 2016 KNI A/S-ip iluani Niuertunngorniarneq aallartimmalli Niuertunngorniat 36-it Niuertutut soraarummeersimalerput.

Arfininngormat 21. april aamma Niuertunngorniat 12-it allat hold IV aallartipput.

Niuertunngorniat naammassisut arfininngormat soraarummeereerlutik tamarmillu angusilluarlutik unnukkut Hotel Sisimiut-ni nereqatigiinnermi tulluusimaaqalutik allagartassaminnik tunineqarput.

KNI A/S-imi sulisoqarnermut ningiu Mikol Poulsen Niuertut uppernarsaatissaannik agguaanissani aallarnerlugu oqaaseqarnermini ilaatigut oqarpoq:

"Asasakka niuertut
Niuertunngorniarneq siorna septemberimi aallartitarsi ullumikkut arfininngornermi misilitsinnermik naggaserlugu naammassivarsi. Tamassilu angusillusi.
Pilluarujussuaritsi, tulluusimaarnaqaasi, tulluusimaarutissaqarpusilu." nangillunilu:
Siorna 29. september 2017 pisortaanerup Niuertunngorniarneq aallartillugu tikilluaqqusinermini ilaatigut oqaatigaa, neriuutigalugulu naatsorsuutigalugu Niuertunngorniarneq naammassillugu peqataaffigereerussiuk paasilluarumaarissi, soormi peqataaqqullusi piumaffigineqarsimanersusi; neriuppungalu tamanna ullumikkut tamassinnut erseqqinnerulersimassasoq."

KNI A/S-imi pisortaanerup arfininngormat unnussioqatigiinnermi peqataanngitsup inuulluaqqussutaa Mikol Poulsen-imit apuunneqarpoq:

"KNI-mi nutaami – pisisartutsinnik kiffartuussilluarnissarput pingaarteqaarput – aamma pingaarteqaarput tamatta suliatsinnut piginnaasaqarluarnissarput. Taamatuttaaq aamma sulisunik sulisitsisinnaanerput pitsanngorsartuartariaqarparput.
Tulluusimaarutissaqarlusi suliffissinnut uteqqilerpusi, saqqarmiortaarsimallusi Niuertutut, ilinniarsimanissinnullu uppernarsaammik tunineqarsimallusi. Angerlamut apuulluarnissassinnik sulilluarnissassinnillu kissaappassi."

Niuertunngorniartut qaammatini qulingiluani ilinniarnertik ingerlassimavaat, peqataasullu piffissap taassuma ingerlanerani pingasoriarlutik Sisimiunut KNI-p kiffartuussiveqarfianut atuagarsoriartortarsimallutik. Najukkaminniikkaangamik attaveqaatit atorlugit Niuertunngorniarnermut ilagitillugu suliakkerneqartarput.

KNI A/S-imi Niuertunngorniarluni Ilinniartitaaneq Mindbiz suleqatigalugu ingerlanneqarpoq.

Niuertunngorniarlutik naammassisut ukuupput,: Henriette Josefsen (Alluitsup Paa), Bendt Abelsen (Kulusuk), Jens Jakob Abrahamsen (Paamiut), Mia Marie Mouritzen (Nanortalik), Katrine Frederiksen (Niaqornaarsuk), Marie Kristiansen (Saattut), Martha Mikaelsen (Tasiilaq), Pîtârak' Fleischer (Sarfannguaq), Jeremias Josefsen (Aasiaat), Karl Samuelsen (Qasigiannguit), Sofie Jensen (Qaanaaq) kiisalu Uthilie Karlsen (Upernavik).

 

Henriette Josefsen, Inni, Alluitsup Paa, soraarummeernermi angusarissaarluinnartoq ilinniarsimanermut uppernarsaatissaminik tunineqarpoq.

 

Bendt Abelsen,
Pilersuisoq Kulusuk:

Angusigama assut nuannaarpunga. Isumaqarsimavunga ukiut 13-it niuertuunikuugama ilinniarnissara pisariaqassanngitsoq. Ullumikkut paasivara ilinniarneq qanoq pingaaruteqartiginera.

 

Mia Marie Mouritzen, Pilersuisoq Nanortalik:

Ilinniarneq ataatsimut isigalugu unammillernartukuluuvoq, suliffinnilu suliassanik piviusunngortitsinissamut unammillernartukuluulluni.

 

Martha Mikalsen, Pilersuisoq Tasiilaq:

Tulluusimaaqaanga allagartaqalerlunga takutitsisinnaalerama. Ilinniarninni pissarsiakka ilikkakkakkalu suleqatinnut atorluarsinnaalerpakka. Siornatigut tunuarsimaartarsimavunga, maanna pissutissaaruppunga.

 

Sofie Jensen Qaanaameersoq nuannaaqisoq sulisoqarnermut pisortamit Mikol Poulsen-imit ilinniarsimanermut uppernarsaammik tunineqarpoq.

 

Pîtârak´ Fleischer, Sarfannguani niuertoq, nuliami Sisimiuni ilinniagaqalernera pissutigalugu Niuertutut suliunnaarsimagaluarluni Niuertutut ilinniarneq naammassivaa.

 

Jens Jakob Abrahamsen (Paamiut)

 

Jeremias Josefsen (Aasiaat)

 

Karl Samuelsen (Qasigiannguit)

 

Uthilie Karlsen (Upernavik)

 

Marie Kristiansen (Saattut)

 

Katrine Frederiksen (Niaqornaarsuk)