Niuertunngorniarneq – Atuaqatigiit tallimaat

Niuertunngorniarneq – atuaqatigiit tallimaat – tamarmik angusillutik naammassipput

KNI A/S-mi Niuertunngorniat 14-it sisamanngornermi 3. Oktober 2019 ilinniarnertik naammassillugu allagartartaartinneqarput.

Atuaqatigiit tallimaat  15. Februar 2019 Niuertunngorniarneq aallartippaat, taamaalillutillu maannamut pingasoriarlutik Sisimiuni KNI-ip Kiffartuussivianut ilinniarnermik atuagarsornertaa ingerlakkiartoreersimallugu.

Niuertunngorniat soraarummeereerlutik unnukkut nereqatigiinneranni KNI-p pisortaanera Peter Grønvold Samuelsen ilaatigut ima oqaaseqarpoq:

“Qangarsuaq siulitta ukkusissamik qulleq kisiat qaammaqqutigigallaramikku taqqissuut atortoralugu qaammarissartarsimavaat qulissiulluunniit atorlugu iganerminni qalakkasuartitsissutigisarsimallugu. Qaammaasaqarneq inuiaqatigiittut qaammaasaqassuseq oqaasiupput kalaaliusutsinni pisariaqartittorujussuusagut pingaarutilerujussuit. Qaammaasaqassuserput inuttut inuiaqatigiittullu inerisimassuseqarnerput piorsartariaqarparput, nunarsuarmioqataanitsinni kinguussaagaluttuinnassanngikkutta. Taqqissuut aqqutigalugu KNI-mi siuttut sulisullu qaammarsarneqarnissaat ukiuni makkunani annertuumik ukkapparput, Niuertunngorniarneq, Ikummatissaasivilerisunngorniarneq Aqutsisunngorniarnerlu ilaatigut aqqutigalugit. Ineriartorneq tamatigut isumaqanngilaq kinaassutsitta kalaallit kultooritta oqaluttuarisaanittalu suusupagineqarnissaannik. Akerlianik nunarsuarmioqataasinnaavugut, oqaatsitigut piginnaasagut ineriartortissinnaavagut kalaaliussuserput suusupaginngikkaluarlugu, inuiaqatigiittut kalaallisut kinaassutsitta naleqartitattalu nunami maani pingaartinneqarlutik saqqumilaartinneqarlutillu nuannaartorinartunngorti taallutillu atorneqarnissaat KNI-mi suleqataaffigerusupparput Kalaallit Inuunerat paasillugu ataqqillugulu kiffartuusseriaaseqalerlutalu ingerlatseriaaseqalernitsigut.”

“Taamaammat maaniippugut nuannaarluta tulluusimaarutigalusilu ilissi suleqatigut ilinniakkamik inuttut unammillernartumik naammassinnilluarassi.  
Pilersuisumut pisiniartartutta KNImilu kiffartuuttakkatta pitsaanerpaamik sullissinnaanissaat angorusupparput. Sineriammi suliffissinni suleqatigiit iluini aqutsilluarnissaq suliassanik ilisimasaqarluarnissaq kiffartuussillaqqissuunerlu minnerpaamik piginnaasaqarfigissagisi kissaatigaarput. Tamakku oqaasiinnaassanngillat kusassakkat, kisianni taamaattuujumalluta oqarutta taava timitalimmik takutissinnaasariaqarpagut.”

“Niuertunngortut – neriuppunga qularinagulu angerlarussi suliffissinni suli pitsaasumik sunniuteqarlusi sulilluarumaartusi. Niuertutut atorfeqanngikkaluaraanniluunniit Niuertunngorniarnermi sakkussat pissarsiarisimasasi iluaqutiginiartussaavasi. Piffissap ingerlanerani Niuertutut atorfiit sineriammi inuttassarsiuunneqartarput, neriuppunga ilasi taamatut ingerlariaqqinnissaminnut misiliisarumaartut, sumiffinnilu ataasiakkaani niuertumut illussarititaasut akunnattoorfiunngikkaagata periarfissasi annertoorujussuupput.”

Saamerlermiit: Nuka Skifte Poulsen, Napasoq – Inuk Alaufesen, Kangaatsiaq – Minik Stephensen, Nanortalik – Ane Louise Nielsen Jensen, Qaarsut – Edvard Nielsen Aronsen, Kullorsuaq – Karoline Sakariassen, Upernavik Kujalleq – Nuka-Berthe Jeremiassen, Qasigiannguit – Hanne Jakobsen, Arsuk – Rosalia Korneliussen, Tiilerilaaq – Signe Kreutzmann, Kangaamiut – Juliu Jakobsen, Narsarmijit – Gabriel Hansen, Aappilattoq, Upernavik – Naasunnguaq Inusugtok, Attu – Kathrine Zeeb, Uummannaq.

Piviusut

Niuertunngorniarneq KNI A/S-ip nammineq pilersitaa Mindbiz suleqatissatut isumaqatigiissuteqarfigalugu pilersinneqarpoq, ilinniarnermi aqutsinermut sammisut Mindbiz suleqatigalugu ingerlanneqarput, taamatuttaaq KNI A/S- imi sulisut, KNI A/S-ip ineriartortitsinermut immikkoortortaqarfia suleqatigilluinnarlugu ingerlatseqataapput.

KNI A/S-ip Niuertunngorniarneq nammineerluni aningaasalersorpaa.
Ilinniakkamik naammassinnittuni 14-niusuni:

• Ataaseq Napasumiit, ataaseq Kangaatsiamiit, ataaseq Nanortalimmiit, ataaseq Qaarsuniit, ataaseq Kullorsuarmiit, ataaseq Upernavik kujallermiit, ataaseq Qasigiannguaniit, ataaseq Arsummiit, ataaseq Tiilerilaamiit, ataaseq Kangaamiuniit, ataaseq Narsarmijiniit, ataaseq Aappilattuniit, ataaseq Attumiit, ataaserlu Uummannamiit.
• Arfinillit niuertutut sulipput, arfineq pingasut sulisuullutik.
• 14-t ilinniarlutik aallartipput, 14-nillu naammassipput angusillutillu.
• Inaarutaasumik misilitsinnermi angusaq agguaqatigiisillugu 6,5-uvoq.

Niuertunngorniarneq august 2016-ip aallartinnerata kingorna maannamut atuaqatigiiaat tallimassaat taamaalillutik ilinniartitaaneq pingasunik immikkoortortalik naammassivaat, ikerinnakkut unittoqaratik, tamarmillu angusillutik.
Niuertunngorniarnermi sulisut 62-it taamaalillutik Niuertutut allagartartaartinneqarput.