Nikolaj Svendsen KGH/KNI-mi atorfeqarnermini ukiuni 50-inngortorsiorneranit

Pingasunngornermi 5. april 2017 KNI A/S-ip qitiusumi kiffartuussiviani Sisimiunniitumi ilasseqatigiissitsisoqarpoq, Nikolaj Svendsen-ip KGH/KNI-mi atorfeqarnermini ukiuni 50-inngortorsiornera malunnartinniarlugu.

Nikkulaap nuliaa ilaqutaalu qaninnerit peqataapput, soorluttaaq kiffartuussivimmi sulisut, quersuarmi ikummatissaarniarfimmilu sulisut najuullutik.

Pisortaaneq Peter Grønvold Samuelsen tikilluaqqusereerami takkajaamik oqaaseqarpoq, nalliuttorsiortup ukiorpassuarni KGH-mi KNI-milu atorfeqarnermini nalaattagaasa ilamininnguinik eqqaasaqartarluni. Taamanikkut suliffeqarfissuarmi aalajangigassat pingaarnerit tamarmik Københavnimi Strandgade-mi Naalagarsuarnit aalajangerneqartarput. Assersuutigalugu sulisut nunaqarfimmiit nunaqarfimmut nuutsinnialeraagamikkit telegram nassiutiinnartarsimavaat, soorlumi aamma tamanna Nikkulaap ilaqutaasalu misigisarsimagaat, assersuutigalugu Alluitsup Paaniit Kullorsuarmut nooqquneqaramik.

Nikolaj Svendsen KGH-mi sulileqqaarami nukappiaraataaqqaarsimavoq, taavali aamma niuertussaaqqatut ilinniarsimavoq, tassa taamanikkut handelsassistent elev-iusimavoq, handelsassistent-itullu klasseficererneqarsimalluni. Niuertorusiusimavoq nunaqarfinni arlalinni. Upernavimmi pisiniarfimmi ittuusimavoq, kingornalu aamma salgschef-itut Upernaviup pigisaa akisussaaffigisimallugu. Ullumikkut kiffartuussivimmi ukiuunerani nioqqutissanik pilersuineq suleqataaffigisaasa ilagaat.

Pikkorissaasarnerpassuarni peqataasarsimavoq, kiisalu nunaqarfinnut ikiuukkiartortitaasarsimalluni. Marlussoriarluni ukiuni arlariinni KNI Service A/S-ip siulersuisuini suleqatiminit qinigaalluni ilaasortaasarsimavoq.

Pisortaanerup takkajaamik oqaaseqarnera ilaatigut qungujunnartunik imaqarpoq, Nikkulaallu sineriassuatsinni suleqaterpassuisa eqqaamasalikkersaarutaannit imaqarluni. Nikkulaat Kangerlussuarmi
pikkorissariartilluni aamma histernialersimavoq. Piniaasaamik histi qaqqivigigamiuk napparussuaq qaqiniarnermini iluaqutigisimasani talliminit eqitaarsimasani iperarneq sapilersimavaa, uffa massa issiavigisaa
histinnguakkuluk assut aallarusussimagaluartoq. Ila kiisami isigalugu qanoq isikkoqarsimassagaluarnerpoq. Immaqagooq taamanerniilli Nikkulaat sissagalaalersimavoq... :)

Logistikchef Kurt Lauritsen angalasoq sinnerlugu Markus Falksen oqaaseqareermat nalliuttorsiortoq nammineq aamma takkajaamik misigissutsinik ilallugu KGH/KNI-mi sivisoqisumik atorfeqarsimanerminit eqqaamasalikkersaarpoq.

Soorlu taamani niuertorutsit puisip amiisa tunisaasut akisussaaffigigallarmatigit. Upernaviup eqqaannaani taamanikkut ukiumut puisip amii 8.000-it tunisaasarsimapput. Ataasiakkaarlugillu nalilersorneqartarsimapput, 1, 2 aamma 3-mik nalilerneqartarsimallutik, tassa pitsaassusilerneqartarsimallutik. Tamakkulu Danmarkimut nassiunneqaraagasa KGH-mi atorfilissuit kikkuugaluarnersut puisip amii niuertorutsinit nalilersorneqareersimasut nalilersoqqittarsimavaat, amerlasuutigullu niuertorutsit nalilersuineri ajorineqartarsimallutik.

Ukiuni siullerni Nikkulaap atorfeqarnerata nalaani avannaani nunaqarfinni attaveqaatit tassatuaapput allakkasuartaatit radio-lu tamatigut naalaarniarfigissuinnaaneq ajortoq. Oqarasuaat atuutilermat nunaqarfimmi oqaloqatiginiarneqartoq angerlarsimaffianut niuertorutsimit arpaarneqartarpoq. Niuertoruseq angalasimappat angalaarsimappalluunniit, nuliaasup ilaqutaasulluunniit arpaarneq isumagissavaa. Tamakkununnga immikkut akilerneqarneq ajorpoq.

Ilami ukiorpassuunngitsut matuma siorna tikillugu pissutsit imaapput, umiatsianik angalasut nunaqarfimmut tikitsillutik piffissaq apeqqutaatinngilluinnarlugu, sapaataappat nalliuttuuppalluunniit taava ikummatissarserusuppat niuertoruseq pisussaavog pisisitsissalluni.