Niels Andersen toqukkut qimaguppoq

Pilersuisup pisortani annaavaa.

Pilersuisumi pisortaq Niels Andersen marlunngornermi 25. februar 2020 toqukkut qimaguppoq, 42-iinnarnik ukioqarluni. Niels-ip qimataraa ukiuni 16-ni inooqatigisani asasani Rikke Bojsen.

Niels Andersen MBA-mik ilinniagaqarnerminut atatillugu Nuummiitilluni toquvoq.

Niels ukiuni kingullerni pingasuni Pilersuisumi pisortaavoq. Tamanna sioqqullugu 2007-miit 2016 tikillugu Pisiffimmi pisiniartarnermut ussassaarinermullu pisortaasimavoq, taamaalilluni Rikke-lu ukiuni kingullerni 13-ni Nunatsinni najugaqarsimalluni.

Niels Andersen Kalaallit Nunaannut nuunngikkallarami Danmarkimi Kvickly-mi ISO Supermarked-imilu suliffeqarsimavoq, akademiøkonom-itut aamma HD Organisation og ledelse-mik ilinniagaqarsimalluni.

Tupannaqisumik aliatsannangaaqisumillu tusarlerneqarpugut Niels piaarpallaarujussuartumik tassanngaannaqisumillu toqunera pillugu. Oqaasissaaleqinarpoq paasiuminaaqalunilu, qanoq ililluni inuk Niels-itut nukittutigisoq, peqqitsigisoq nuannaartigisorlu uisorilanerinnarmit inuunermik nuannarisaminik arsaagaasinnaanera, sumik ilimatsannarsinnaasumik pisoqanngitsorluunniit.

Pilersuisoq pisortamik pikkorissumik annaasaqarpoq, KNI-milu aqutsisoqatigiit piginnaaneqqortuumik ataqqisaasumillu suleqatiminnik annaasaqarput.

KNI-mit qamanngavik misiginneqataanerput Rikke-mut ilaqutaasunullu ingerlatipparput.

Eqqaaneqarnera ataqqinartuuli.

Peter Grønvold Samuelsen
Adm. direktør
KNI A/S

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl