KNI A/S-ip Nagdlúnguak' 48-imut aningaasaliisarnera ukiunik marlunnik sivitsorneqarpoq

Ilulissani timersoqatigiiffimmut Nagdlúnguak´ 48-imut KNI A/S-ip aningaasaleeqataasarnissamik isumaqatigiissutaata sivitsorneqarnera 2019-miit 2020-ip tungaanut atuuttoq sivitsorneqaqqippoq ukiunik marlunnik.

Aningaasalersueqataanissamik (sponsoraftale) isumaqatigiissut ukiuni pingasuni atuuttoq 7. november 2016 Ilulissani persuarsiornartumik atsioqatigiissutigineqarpoq. Tassungalu ilassutitut KNI-p timersoqatigiiffimmut aningaasaleeqataasarnera sivitsorneqarnikuuvoq maj 2019-miit maj 2020 tungaanut. Massakkullu isumaqatigiissut aappassaanik sivitsorneqarpoq, tassa juni 2022-ip tungaanut KNI aningaasaliisuussalluni.

KNI A/S-ip tungaaniit isumaqatigiissutip atuunnera pillugu naammagisimaarnartumik ingerlavoq, tassami suliniutit, peqatigiiffiit allallu ukiut ingerlanerini amerlaqisut aningaasaliiffigineqartarsimasut assiginagit       N-48 ingerlaavartumik KNI-mut ilisimatitsissuteqartuarnikuuvoq, assinillu nassiussuiuartarnikuulluni.

N-48 inuiaqatigiinni akisussaaqataanertik naapertorlugu meeqqat inuusuttullu akornanni sammisassaqar-titsiuaannarpoq. Minnerunngitsumillu KNI-p aningaasaliineratigut N-48 periarfissaqalernikuuvoq piffissaq katersiniarnernut atugassaagaluaminnut taarsiullugu utoqqaat utoqqaat illuanni najugallit pisuttuaallugit aneertittalernerannut. Suliniutillu taama ittut saniatigut illoqarfiup iluani pinngortitamilu eqqagassanik katersisarput illoqarfimminni torersuutitseqataarusullutik.

“Nuannaarutigisorujussuuara suliffeqarfittut Nagdlúnguak’ 48 aningaasaliisarnissamik isumaqatigiissute-qarfigisinnaagatsigu, nalunngilarpummi timersoqatigiiffimmi tassani timersortartut pimoorussinerit pimoorussinnginnerusullu tamarmik inissaqartinneqarlutik annertoorujussuarmik suliniarfigineqartut, meeqqat, inuusuttut, inersimasut utoqqasaallu ilanngullugit. Pitsaaliuineq eqqarsaatigalugu timersoqatigiiffiup meeqqat pillugit suliniarnerat assut tapersersorparput. Taakkumi peqqinnartumik timikkut tarnikkullu nukittuunngornissaat isumagisariaqarpoq, piginnaanerillu taama ittut suliffeqarfitsinni aamma atorfissaqartippagut. Nagdlúnguak’-mi timersuutit assigiinngitsorpassuit aallunneqarnerat aamma malunginiarsimavarput. Isumaqatigiissut aningaasanik tapiissutaannartut isiginngilarput, tamanulli iluaqutaasussatut isigaara.” KNI-p pisortaanera Peter Grønvold Samuelsen oqarpoq.

Aningaasalersueqataanissamik isumaqatigiissut siulleq atsiorneqarpoq Ilulissat timersortarfissuanni N-48-mi ilaasortarpassuarnit najuffigineqartumik 7. november 2016.

N-48 timersuutinik arlanillik ingerlataqarpoq: Isikkamik arsarneq, futsal, assammik arsarneq, nerrivimmi arsaararneq, kiisalu Inuit timersuutaat.