Dansk
English
KalaallisutMBA-ngortut nutaat
KNI A/S-imi pisortaaneq Peter Grønvold Samuelsen aamma Qarasaasiaqarnermut pisortaq Anders Gregers Ratzow visitkort-iminni MBA allassinnaanngorpaat.
Taakku piffissami april 2017 – august 2019 Executive MBA Arctic peqataaffigereerlugu naggataasumillu misilitsinnerminni angusarissaarfigalugu naammassivaat.
Ilinniarnermik ingerlanerani Anders Piitarlu aqqaneq marloriarlutik Nuummukartariaqarnikuusimapput, atuartitsineq Nuummi ingerlanneqartarmat. Nuummukarnissarlu sioqqullugu tamatigut atuakkat atuagassallu quppernerit amerlaqisut atuareersimasartussaasimallugit.
Taamaalillutik Anders Piitarlu MBA-tut imminnut taasinnaanngornissamik tungaanut modul-it aqqanillit aqqusaaqqaartariaqarsimavaat, opgavet qulingiluat tunniuttussaasimallugit, opgave angisooq tunniuttussaasimallugu immikkullu soraarummeerutigisimallugu, CBA opgave angisooq tunniuttussaasimallugu immikkullu soraarummeerutigisariaqarsimallugu, kiisalu MBA opgave angisooq suliarisariaqarsimallugu immikkullu soraarummeerutigisariaqarsimallugu, aqqaneq aappassaanillu Nuummukarlutik nasartaariartorlutik.
Ilinniarneq ukiut marluk ingerlanerini pisimavoq KNI A/S-imilu tamakkiisumil piumasaqarfioqisumillu atorfeqarnerminni suliassatik ingerlatiinnarsimallugit.
Nunatsinni MBA siulleq ingerlanneqarpoq, aallartikkamik peqataasut 17-iusimapput, taavalu 28. august 2019 nasartaarput inuit 9-at.
MBA sunaana?
MBA - Master of Business Administration – nunarsuarmi tamarmi aqutsisutut ingerlaqqiffiusumik ilinniartitaaneruvoq immikkut ataqqiniarneqartorujussuusoq, siunissamilu pisortanngortussanut ilinniartitaanerusoq.
MBA ilinniartitaaneq – ilinniartitaaneruvoq qaffasissumik ingerlaqqiffiusumillu ilinniartitaanernut kandidat-itu taaneqartartunut sanilliunneqartartoq aqutsisunut immikkullu ilisimasalinnut ilinniartitaaffissatut siunertaqartoq. MBA suliffeqarfinni aqutsisinnaaneq pillugu sukumiisumik atorneqarsinnaasumillu ilinniartitaaneruvoq, teori aamma metode aallaavigalugit suliffeqarfimmik nalilersuisinnaanermik, periusissiorsinaanermik unammillersinnaassuseqarsinnaaneranillu sakkussanik pissarsiffiusinnaasoq. Ilinniagaq aamma inuttut annertuumik ineriartortitsisinnaassuseqarpoq aqutisussatullu periarfissanik ammaassisuusarluni.
Business Institute:
”Isumaqarluinnarpugut sumiiffiup ilorrisimaarfiusup avataaniitillutik pisortat nikeriarnerpaasartut piginnaasassaminnillu pissarsisartut ukiuni aggersuni pisariaqartilluinnagassaminnik.”
MBA-mi ilinniarnikkut paasinnittaaseq sunnerneqarsinnaavoq niuernermi pissutsit sukkasoorujussuarmik allanngorarfioqisumillu ineriartorneri pillugit, pisortatullu suliffeqarfik aqutat pillugu aqutsissallutit siunissaq aallaavigalugu, ullumikkulli pisut tunngavigalugit aalajangiisarlutit.
MBA-mi ilinniarneq isummersornernik imminnut ukeruuttunik unammillernaqisunillu nalaataqarfiusarpoq.
Pisortaanernut piumasaqaatit naatsorsuutiginninnerillu annertoorujussuupput:
”Ukiut tusintsillit nikinnerisa kingorna suliffeqarfissuarnik angusaqarissaartitsilluni aqutsilluarnissamu piumasaqaatit pisortaanerillu piginnaasassaannut pissuserisassaannullu sakkortusinikooqaat. Nunarsuarmi atugartuussutsikkut piorsaanerit pissutsit suulluunniit ersarinnerulersissimavaat uippakajaarnarnerulersissimallugillu, niueqatigiinnerullu iluani ileqqussat nutaat pilersimapput, tamakkununngalu aamma MBA-mik ilinniartitaanerit malinnaatinneqarput siunissami pisortaaninngorumaartussat sakkussaannik malinnaasinneqartariaqarmata.
Niuernermi tunngaviit, ilisarnaatit, nioqqutissat suleriaatsillu pussunnerinnarmik ullumikkut allanngorluinnarsinnaapput. Teknologi nutaaq, inuiaqatigiinni ineriartorneq nioqqutissat atortorissaarutillu nutaaliaasut suliffeqarfinnik pioreersunik piffissap sivikittuararsuup iluani suujunnaarsitsisinnaasut nalaanni inuuvugut.
Suliffeqarfimmik aqutsinissamut piumasaqaatit assut allanngorsimapput. Pissutsit taamaattuartut nalaaniinnerput qaangiussimavoq."
