Lars Andersen ukiuni 40-nngortorsiorpoq

Saamerlermiit Edel Larsip nulia, qeqqani Lars Andersen talerperlermilu Lars Edelillu ernutaat.

Kiffartuussivimmi Qarasaasiaqarnermi immikkoortortaqarfimmi ukiorpassuarni suleqaterput Lars Andersen sisamanngormat 29. oktober 2020 siullermik KGH-mi massakkullu KNI-mi ukiuni 40-nngortorsiornera persuarsiorfiusumik nalliussineqarpoq.

Lars KGH-mi ilinniartunngorsimavoq 29. oktober 1980-imi Qeqertarsuarmi – taamanikkut kontorlærlingitut. Ukiut marluk aallartinnerminiit qaangiummata Lars allaffimmiutut naammassivoq ingerlaannarlu Qeqerarsuarmi atorfinilluni.

Larsip ukiut ingerlanerani KGH-mi KNI-milu atorfiit assigiinngitsut qulit missaaniittut illoqarfinni arfinilinni aqqusaarsimavai, atorfiit makkuusut:

• Allaffimmioq
• Handelsassistenti
• Handelsforvalterassistenti
• Andelsfuldmægtigi
• Immikkoortortaqarfimmi aqutsisoq
• Trafiklederi
• Ingerlatsinermi pisortaq
• Nunaqarfinnut siunnersorti
• Ingerlatsinermut siunnersorti
• IT Retail Manageri
• IT-mi ingerlatsinermi pisortaq

Ullumikkut Lars 1. juni 2016 aallarnerfigalu IT-mi ingerlatsinermi pisortatut atorfeqarpoq.

KNI-mi pisortaanitta Peter Grønvold Samuelsennip Larsip ukiuni 40-nngortorsiornerani ilaqutai ilanngullugit pilluaqqusinermini Larsip ukiorpassuarni suleqatigisimasaata pilluaqqussutaat - eqqaamasalersaarutaat ilaatigut ima ilannguppai:

“Larsimut tunngatillugu eqqaasinnaavara inuk saamasoq nuannersumik kinnertartoq, ikiuukkumatooq, inussiarnersoq. Meeraaqatiginikuuara Qeqertarsuarmi inuk taamanili nuannersuuvoq. Ikast Handelsskolemi aamma atuaqatigaara aamma tassani eqqaamasat nuannersuinnaapput ikiukkumatugami qiimasuullunilu. Sisimiut nuummat suleqatigilerparput 80-ikkunni, aamma tassani nalunngilara suleqamminik nuannarineqartorujussuaq” – Ane Marie B. Ingemann.

Nalliuttorsiornermi assit Larsimut tunngasut ingerlaartinneqarput.

”Ulloq 01-06-2016 Lars IT-qarnermi ingerlatsinermi pisortanngorpoq, taamanerniillu IT-qarfiup suliassaanut tunngatillugu ulluinnarni pilersaarusiorneq isumagisarilersimavaa. Lars naatsorsuutigineqarsinnaajuaannartuuvoq, Larsillu 1998-imiit ullumimut napparsimalluni ullut suliartunngiffigisimasai assammi inussat illuttut qaangeqqanngilaat, Larsilu sutigut tamatigut suleqatitsialaajuaannartuuvoq.” - Anders Gregers Ratzow.

Pisortaanerput Peter Grønvold Samuelsen pilluaqqusinini ima naggasiivoq:

”Uppernarseqqiinnarparput Lars suleqatikkuminartuusoq, sulilluartuulluni quiasaalaarnissaminullu inissaqartitsisarluni, taamaannerminilu inuppalaartuulluni suleqatiminit nuannarinnitserpassuaqarpoq, qularnanngitsumillu suleqatiminik nuannarisaqarluartuulluni.

Larsi ukiorpassuarni suliffeqarfimmut tunniusimallutit sulisimanerit takussutissalerneqarpoq, qujanarujussuaq pilluarillu. ”

Oqalugiartoqareernerani Lars qujassuteqarluni ilaatigut ima oqaaseqarpoq:

”Ukiorpassuarni KNI-mi sulisimavunga, siullermik KGH-mi. Suliffeqarfimmi taamak angitigisumi suliat allannguinerit torrallatat amerlasuut peqataaffiginikuuakka, tamakku sulisut suleqatigiinnerisigut ataatsimoorluni pilersinneqartarput. Ullorpassuit ilaquttakka qimallugit angalasarnerpassuit aqqusaartarsimavakka, nuliama taamak tapersersorsimanngippanga angalasarnerpassuit aniguiffigisarsimanavianngikkaluarpakka. Suleqaterpassuaqarsimavunga, ilisarisimalersimasallu ikinngillat. Taamanikkut pikkorissarnerit arlallit aamma aqqusaartarsimavakka, ilaatigut service-guidetut ilinniarneq aammalu SISAK taamani niuertunngorniarnerusoq. Qujavunga ukiorpassuarni suleqatigisimagassi.” 

Larsi qungujulluni imatut nangippoq: 

”Ukiualunnguit qaangiupput ernuttama paasigamiuk ukiut amerlasuut sulisimagaanni nalliussineqartartut. Taamaariarmat aperivaanga qanga ukiuni 25-nngortorsiorsimanersunga, akivara ukiut 25-nngortorsioreerlunga, kisianni taamani puigorneqarsimallunga taamaattumillu nalliussineqarnanga. Akivara qanittumi ukiuni 40-nngortorsiussallunga, ernutama saappaanga: ukiut 40-nngortorsiorlutit puigorneqaruit Kiffartuussiviliassaanga gangimilu nilliallunga aataaga qanoq ililluni ukiut 40-nngortorsiortoq puigorneqarsinnaanersoq”.  

Lars ukiuni 40-ni nalliuttorsiorninni ilaquttatillu pilluangaaritsi – qujanarlu ukiorpassuarni suleqataalluaravit :)