KNI-p Qaanaaq Sport Club tapersersorpaa

Qaanaaq Sport Club futsalertartut  saamerlermiit:  Erik Qaerngaaq, Jess Egon Nielsen, Dennis Nielsen, Aleqatsiaq Sadorana, David Jensen, Qisunnguaq Kristiansen kiisalu Henrik Nielsen.

Qaanaami timersoqatigiiffik, Qaanaaq Sport Club innuttaasut timersornerulernissaannik kajumissaarisuuvoq piumassuseqarluarlunilu, KNI-llu ingerlalluarnissaannik tapersersorusullugit tunissuteqarfigai.

Qaanaami timersoqatigiiffik Qaanaaq Sport Club ippassaq 28. oktober 2020 arsaannermi atisassaminnik nutaanik kusanartunik tunineqarput, taakkulu Qaanaami niuertup Larsigne Kvistip KNI sinnerlugu Pilersuisumi tunniuppai.

Atisat assigiinngitsut marluk tunniunneqartut saniatigut inuusuttut uku arsassaannik aamma tunineqarput, tunissuteqarfigineqartullu assut nuannaarsimapput.

- Tunniussisuulluni aamma assut nuannerpoq, takusinnaavarami uku inuusuttunnguit tunisutisiatik assut tupaallaatigalugillu nuannaarutigigaat. Siunissamut isumalluarnat, Larsigne Kvist unnersiorpoq. Larsigne aamma CSR manageri Najaaraq Thorin Lange sinnerlugu oqalugiarpoq:

- KNI-mi inuiaqatigiinni akisussaaqataanermi suliaqartutut nuannaarutigalugu maanna oqaatigisinnaavara illup iluani isikkammik arsartarnissinni timersuutissasi aammalu unammileraangassi atisarisartagassasi atortussasilu tikissimalermata. Matumuunalu ilissinnut arsartartunut Larsignemit tamatta KNI-mit sinnerluta tunniunneqarlutik.

Neriuutigaraara ullumikkut ilissinnut tunniunneqartut siunissami ataavartumik sungiusartarnissinni kusanartumik unamminerni takutitsilluarlusi angusaqarluarlusilu atortarumaarisi, minnerunngitsumillu Qaanaami inuiaqatigiit timersornermik aallutaqartut amerlisarnissaat sulissutigiuarumaarissi. Siunissami suleqatiginissarsi qilanaaraarput, ajunnginnerpaamillu kissaappatsigit.

KNI sinnerlugu Qaanaami niuertup Larsigne Kvistip Qaanaaq Sport Club atisassaannik tunissuteqarfigalugillu oqalugiarfigai.

Qillaq Kristiansen, Qaanaaq Sport Club-imi siulittaasoq, atisataaminnik takutitsisoq.

Septembarimi KNI-mi angalaqatigiit Qaanaamiinnerminni maluginiarpaat uku angutit inuusuttut futsalertartut assut piumassuseqarluartut piukkunnaateqarluartullu. Qaanaaq Sport Club innuttaasunut timersuutinik assigiinngitsunik neqerooruteqarpoq innuttaasullu timersornerunissaannik kajumissaarisuulluni, tassa silami arsarneq, illup iluani arsarneq, sulorarneq aammalu assammik arsarneq neqeroorutigaat. Kalaallit Nunaanni isorliunerusuni timersoqatigiiffiit ataatsimoornermik, peqqinnissamik timersornermillu aallussisut KNI-miit tapersersorusuppagut siuarsaaqataaffigalugillu.

Arsartartut saamerlermiit: Kragh Peary, Josef Petersen, Rasmus Kristiansen, Qillaq Kristiansen, Frederik Duneq.

Arfininngornermi 5. september 2020 KNI-p pisortaanerata suleqatinilu Qaanaamiinnerata nalaani KNI-p aaqqissugaanik illup iluani isikkamik unammisitsisoqareerneratigut pisortaaneq Peter Grønvold Samuelsen-ip timersoqatigiiffimmut nutaajusumut Qaanaaq Sport Club-imut neriorsuutigivaa Qaanaami timersorneq tapersersorniarlugu timersuutinik peqatigiiffik pajunneqarumaartoq. Tamannalu tassa matumuunakkut naammassineqarpoq.

Arsartartut atisartaatik assigiinngitsut marluk atorlugit.

Qaanaaq Sport Club futsal Qaanaamilu niuertoq Larsigne Kvist.

Saamimmiit: Qaanaaq Sport Clubimi siulittaasup tullia Dennis Nielsen kiisalu siulittaasoq Qillaq Kristiansen.