KNI A/S kajumissaammik tunniussivoq

KNI A/S ukiut tamaasa Ilisimatusarfimmi bachelorinngortut akornanni 5.000 koruuninik tunniussisarpoq. Ullumikkut tallimanngornermi 26. februar 2021 aamma taamaaliortoqarpoq.

KNI A/S-ip kajumissaasiuttagaa KNI A/S sinnerlugu siulersuisuni siulittaasup tullianiit Najaaraq Christiansenimiit Michelle Linddal Skov Danielsenimut ullumikkut Inuiaat kulturiat oqaluttuarisaanerannilu bachelorinngortumut tunniunneqarpoq.

KNI A/S-imut ilinniarneq pingaaruteqarpoq. Ilinniagaqarneq aqqutissaavoq taannami iluaqutigalugu atugartuussuseq aamma qaffasinnerulertarmat. Ilinniagaqarnikkut inuiaqatigiinni nalillit pinngortarput, nalillillu tamakku tamatsinnut tuttarput. Taamaappoq ilinniagaq sunaagaluarpalluunniit.

KNI A/S-ip kajumissaasiuttagaa tunniunneqartarpoq bachelorinngortuni agguaqatigiissillugu karakteritigut angusarissaarnerpaajusumut. Tamanna ileqqunngorsimavoq KNI A/S-ip kissaatigimmagu takutissallugu ilinniartunik qanoq iliuuseqarnermikkut sapinngisaminnillu takutitsisunik taamalu angusarissaartunik tapersersuinini.

Michelle, KNI-miit angusarissaarnerit pillugu pilluaqqungaarpatsigit, inuussutissarsiornermilu siunissannik qaamasumik kissaappatsigit.