KNI-p Pilersuisumi pisiniarfimminut 64-iusunut noqqaasarfini allanngortippaa

Pilersuisup ulluinnarni nioqqutigisartagaanut tunngatillugu KNI-p noqqaasarfittut Dagrofa-mut isumaqatigiissutaa ukiup matuma naaneranut killeqarpoq, ukiortaamiillu nutaamik noqqaasarfittaartoqassaaq.   

Pilersuisup pisortaa Brian Weuge Chemnitz: Pilersuisumi pingaarnertut noqqaasarfeqarnissaq suliariumannittussarsiuunnikuuarput, tamannalu tunngavigalugu maannakkut Arctic Import aamma Reitan Distribution A/S isumaqatigiissuteqarfiginiarlutigit aalajangernikuuvugut.

"Pisisartutta akinut pitsaassutsimullu piumasaqaataat qaffasissuusut ilisimavarput. Taamaattumik nioqqutiginiakkatta akiminnut naleqqiullutik pitsaasuunissaat qulakkeertuartussaavarput, Pilersuisup pisortaa Brian W Chemnitz oqarpoq.
 
Ukiuni tallimani atuuttussamik Arctic Import aamma Reitan Distribution isumaqatigiissusiorfiginerisigut Pilersuisup pisisartuni REMA 1000-ip nioqqutaataanik pisiassaqartissavai - nioqqutillu ilarpassui akiminnut naleqquttuunerinik nalilersuisarnermi Bedst til Prisen-imik akissarsitinneqartarsimapput.
"REMA 1000 ukiut kingulliit pingasut ingerlanerini tassaalersimavoq Danmarkimi nioqquteqartartuni ornigineqarnerpaasunik nioqquteqartartoq, tamannalu peqquteqarpoq nioqqutaasa akiminnut naleqqiullugit pitsaasuunerinit avatangiisimillu mianerinnilluinnartuulluni pineranit. Arctic Importip Nunatsinni misilittagaqarluarneratigut (1978-imiilli) isumaqarpunga  pisisartutta ulluinnarni nioqqutinik pilersornissaannik nukittuumik tunngavissaqassasugut – nioqqutigisassattalu 2021-p aallartinnerani ukiup affaata siulliup ingerlanerani nioqqutigilernissaannut qilanaarpugut” Brian Weuge Chemnitz naggasiivoq.

”KNI-mut isumaqatigiissusiornerput uagutsinnut angusaq angisuujuvoq, taamaattumik suliariumannittussarsiuussinermi toqqarneqarnerput soorunami nuannaarutigaarput. Ukiorpassuarni Nunani Avannarlerni ulluinnarni nioqqutit eqqarsaatigalugit pisiniarfigerusunnarnersaanissatsinnik anguniagaqarsimanerput eqqarsaatigalugu maannakkut isumaqatigiissuteqarnerput uagutsinnut pingaartorsiornaqaaq. Ulluinnarni pisiassanik nioqquteqarnitsigut ukiuni kingullerni angusarissaarsimaqaagut kiisalu Islandimi Savalimmiunilu nioqquteqarnitsinni patajaatsumik inissisimalluta, taamaattumillu KNI-mut isumaqatigiissusiornitsigut Kalaallit Nunaanni aamma suli annerusumik nassiussuisarsinnaalissaagut, Arctic Importimi pisortaaneq Thomas Hjort oqarpoq.

Reitan Distributionimi Nunani Avannarlerni Arctic Import ukiorpassuarni suleqatigalugu ulluinnarni pisiassanik nioqquteqarnermut tunngatillugu isumaqatigiissumik sivisuumik atuuttussamik isumaqatigiissuteqarnertik nuannaarutigaat. Noqqaasarfinngornissaminnut tunngatillugu maannakkut Arctic Importimi sulisut peqatigalugu nioqqutissarsiniartarnermi tuniniaanermilu pisortaq Merete Kjærgaard piareersaleruttorpoq: ”Arctic Import aqqutigalugu Kalaallit Nunaannut nioqqutissanik nassiussuisalernissarput qilanaareqaarput, tassami nioqqutissat tikisinneqarsinnaanerisa qulakkeerneqarsinnaanissaasa pingaaruteqarnera ukiorpassuarni suleqateqarnitsigut ilisimaarilluarlernikuuarput. 1. januar piareersimaniarluta maannakkut pilersaarusiuleruttorpugut."

ARCTIC IMPORT A/S PILLUGU

Arctic Import tassaavoq suliffeqarfissuarmut ilaqutaariit pigisaannut Arctic Groupimut ilaasoq 100-llu sinnerlugit sulisoqartoq. Suliffeqarfik tassaavoq inuinnartit pigineqartoq Kalaallit Nunaanni nukittunerpaat ilaat, ulluinnarni pisiassanik niuertunut, neriniartarfinnut umiarsuarnut kiisalu pisortat namminersortullu suliffeqarfiutaannut ulluinnarni pisiassanik nioqqutinillu aalajangersimasunik assigiinngitsorpassuarnik nioqquteqartartoq. Arctic Import ukiut ingerlanerini piginnaaneqarfigisassanik kiffartuussinermillu ineriartortitsisimavoq, Nunanilu Avannarlerni tamani ingerlataqartoq.

REITAN DISTRIBUTION A/S pillugu

Reitan Distribution A/S tassaavoq nerisassat nerinissaannut pisariillisariikkanut Danmarkimi noqqaasarfiit annersaat, REMA 1000 Danmark A/S-imillu suliffeqarfiutigineqartoq, Norske Reitangruppenimullu ilaasoq, suliffeqarfillu 2019-imi katillugit 97 milliarder norskit kr.-inik kaaviiaartitaqarsimasoq.

Reitan Distribution A/S nioqqutissanik REMA 1000-imut ulluinnarnilu pisiassanik kiisalu nerisassat nerinissaannut pisariillisakkanik nioqquteqartunut noqqaasarfiuvoq kiisalu Horsensimi allaffeqarfimminniit pingaarnertullu queqarnermikkut (Vejlemi Avedøremilu queqarnermik saniatigut) Reitan Distributionip pisiniarfiit orsersortarfiillu 900-t sinnillit Danmarkimi tamani ittunut sullissisartoq.

Suliassaat tassaavoq nioqqutinik pitsaasunik nioqquteqarnissaq kiisalu pisariitsunik tunngavissaqarluni sullissinerit, taamaalillunilu pisariitsumik nassiussueriaaseqarnikkut suleqataasunut unammillersinnaassuseqartitsinissaq.

REMA 1000-ip saniatigut suliffeqarfiup nioqquteqartartut makku ilaatigut aamma suleqatigai 7-Eleven, Circle K, OK Plus aamma BFI.

Ukiuni kingullerni REMA 1000-ip Danmarkimi nioqquteqarnermigut siuariartuinnavissimanera tunngavigalugu Reitan Distribution A/S assut ineriartupiloorsimavoq. Ukioq kingulleq danskit aningaasanngorlugit kaaviiaartitaat 15,4 milliardiusimapput.