KNI A/S aamma Timersoqatigiiffik Nagdlunguak´ 1948 isumaqatigiissuteqartut

Ukiorpassuarni KNI timersornermut timersornermilu ineriartortitsinermut aningaasalersueqataavoq, ataasinngornermilu 7. november 2016 KNI Ilulissanilu timersoqatigiiffik Nagdlunguak 48 ukiunut pingasunut aningaasaliisarnissamik isumaqatigiissuteqarput.

Isumaqatigiissut atsiorneqarpoq Ilulissani multihal-imi.

Kalaallit Nunaanni Assammik Arsartartut Kattuffiannut Kalaallit Nunaannilu Tae-Kwon-Do-rtartut Kat-tuffiannut KNI aningaasaliisarunnaarmalli timersoqatigiiffimmut ataatsimut aatsaat taama aningaa-sartaqqortutigisumik isumaqatigiissusiorpoq.

Tamanna pillugu KNI-mi pisortaaneq Peter Grønvold Samuelsen ima oqarpoq:

“Nuannaarutigisorujussuuara suliffeqarfittut Nagdlunguak 48 aningaasaliisarnissamik isumaqatigiis-suteqarfigisinnaagatsigu, nalunngilarpummi timersoqatigiiffimmi tassani timersortartut pimoorussinerit pimoorussinnginnerusullu tamarmik inissaqartinneqarlutik annertoorujussuarmik suliniarfigineqartut, meeqqat, inuusuttut, inersimasut utoqqasaallu ilanngullugit. Pitsaaliuineq eqqarsaatigalugu timersoqatigiiffiup meeqqat pillugit suliniarnerat assut tapersersorparput. Taakkumi peqqinnartumik timikkut tarnikkullu nukittuunngornissaat isumagisariaqarpoq, piginnaanerillu taama ittut suliffeqarfitsinni aamma atorfissaqartippagut. Nagdlunguak-mi timersuutit assigiinngitsorpassuit aallunneqarnerat aamma malunginiarsimavarput. Isumaqatigiissut aningaasanik tapiissutaannartut isiginngilarput, tamanulli iluaqutaasussatut isigaara.

Timersoqatigiiffimmik isumaqatigiissuteqarfigisinnaasatsinnik ujarlernitsinni Qaanaami assammik ar-sartartut Tasiilamilu isikkamik arsartartut attaviginiarsimavagut iluatsippianngitsumilli – neriuppungali tamanna aamma iluatsikkumaartoq. Sineriammi klubbit allat aamma qimerloorsimavagut, Nuulli avataani timersoqatigiiffimmik toqqaassagutta nalornisimanngilagut Nagdlunguak piukkunnarnerpaajusoq, timersornikkut nuna tamakkerlugu angusarisartagai kisiisa isiginagit, aammattaarli siulersuisoqarnikkut patajaatsumik siulersorneqarnerat, kiisalu timersuutinut assigiinngitsunut ataatsimoorfiunera pissutigalugu, tassami Nagdlunguak assammik isikkamillu arsartartoqarpoq, illup iluani isikkamik arsartartoqarluni, nerrivimmi arsaarartartoqarluni, sulorartartoqarluni issittumilu pinnguaatinik unammisartoqarluni.”

Nagdlunguak 48-mi siulittaasoq Lena Ravn Davidsen ima oqaaseqarpoq:

“Timersoqatigiiffitsinnut KNI-p aningaasalersueqataasartussatut isumaqatigiissuteqarfiginera tulluu-simaarutigeqaarput, tamanna piffissami sivittajaami oqaloqatigiissutigisimavarput. Klubbitsinni siulersuisut namminnerlu kajumissusertik aallaavigalugu ikiuuttartorpassuit nukissanik nutaanik tunineqarpugullusooq klubbitta suli nukittunerulersinnissaanut sulinissatsinnut. Inuusuttuaqqanik timersornerullu iluani tamanut suliniarnerput pingaarutilerujussuuvoq klubbitsinni pikkorussunik timersortartoqalernissatsinnut. Naatsorsuutigilluinnarpara aningaasalersuinissamut isumaqatigiissut manna toqqammavileeqataalluassasoq sineriammi timersoqatigiiffiit Nuummi timersoqatigiiffinnut unammillerluarsinnaanerunissaannut, Nunatsinnilu tamarmi timersornerup iluani ineriartornermut pitsaasumik malitseqassalluni.”

KNI-p Nagdlunguak 48-llu akornanni isumaqatigiissut ukiuni pingasuni atuutissaaq. Isumaqatigiissut naapertorlugu timersortartut taskinik, allarutinik, imerfinnik atisanillu atugassinneqartassapput, saniatigullu ukiumut kr. 300.000,-nik aningaasartaqarluni.