KNI A/S-imi Pre MBA-mut ilinniarneq

KNI A/S aqutsisoqatigiit isumaqarput ilinniaqqinneq aqqutissaasoq pitsaasoq. Taamaattumik KNI A/S aamma Business Institute (Aalborg) suleqatigiinnerisigut KNI A/S-imi Taqqissuummi Pre MBA-mik ilinniartut 18-it februarip 12-ni 2018 aallartipput,  modul I ingerlallugu. 2018 inerlanerani  modulit sinneri, modul II aamma modul III KNI-mittaaq ingerlattartussaavaat. Peqataasut 18-iusut suliffeqarfinnit allaniit illoqarfinniillu assigiinngitsunit aggerfeqarput.

Suliffeqarfiit peqataatitaqartut ukuupput:

• KNI A/S peqataasut 8
• Qeqqata Kommunia peqataasut 4
• Hotel Sisimiut peqataasoq 1
• Mittarfeqarfiit peqataasut 3
• Arctic Circle Business peqataasoq 1
• Sulisartut Højskoliat peqataasoq 1

- Tulluusimaarnarpoq KNI A/S-ip suliniuteqarneratigut piginnaanngorsarneq qaffasittoq maani Sisimiuni Kiffartuussivitsinni ingerlanneqarsinnaalermat, suliffeqarfiillu allat neqeroorut tamanna peqataaffigerusummassuk, Peter Grønvold Samuelsen Pre MBA-mut ilinniarneq nutaaq pillugu oqarpoq.

Pre MBA suliffeqarfinni namminersortuni pisortallu suliffiutaanni annertuumik misilittagalinnut qaffasinnerusumilli ilinniagaqanngitsunut naatsoorsuussaavoq. Ilinniarneq ukiup ataatsip iluani sulinerup saniatigut ingerlanneqassaaq, pingasoriarluni naapittoqassalluni.

Pikkorissarneq 12. februar 2018 aallartippoq, 15. februar tungaanut ingerlassalluni. Qulaani ilinniartut KNI-mi angalaarnerannit asseq takuneqarsinnaavoq.