KNI A/S ileqquusumik ataatsimeersuarpoq

Sisamanngornermi 18. august 2016 KNI A/S ileqquusumik ataatsimeersuarpoq, Sisimiuni. Piginnittut sinnerlugit Naalakkersuisut Siulittaasuat Kim Kielsen ataatsimeersuarnermik ingerlatsisuuvoq.

Ataatsimeersuarnermi siulersuisut nalunaarutaat tusaatissatut tiguneqarpoq ukiumoortumillu naatsorsuutit 2015/16-imoortut akuerineqarlutik.

KNI-mi siulersuisut siulittaasuat Niels Thomsen nalunaaruteqarnermini ilaatigut ima oqarpoq: ”Ukiumut angusat – akileraarut ilanngaatigereernagit 101,2 mio. kr. – takutippaat suliffeqarfissuaq aqulluarneqartoq aammalu aningaasaqarnikkut ingerlalluartoq, taamalu angusarisartakkaminik pitsaasunik ingelatitsiinnartoq. Niuernikkut pissutsit sakkortuneruleraluartut, ilaatigut nunaqarfiit ilaasa illoqarfiillu mikinerusut inukilliartornerat eqqarsaatigalugu, taamaattoq ukiumut siulianut sanilliullugu angusat pitsaanerulerput.”

Naalakkersuisut Siulittaasuat Kim Kielsen KNI-ip angusarissaarnera pillugu nersualaarinnippoq, sulisut, aqutsisut siulersuisullu qutsavigalugit. Ilaatigullu oqarluni: “KNI-p unammiligassai akisussaaffiilu eqqarsaatigalugit Naalakkersuisut isumaqarput ukiumi angusat naammagisimaarnartuusut angusallu KNI-llu oqaluttuarisaanerani angusat pitsaanerit ilagigaat.”

Ataatsimeersuarnermut inassutigineqartutut ataatsimeersuarnerup aalajangerpaa, piginnittunut DKK 20 mio.-it sinneqartoorutisiaritinneqassasut. Taakku saniatigut ukiumi naatsorsuuteqarfiusumi sulisut akileraarutaat 72 mio. kr.-iusut, kiisalu 12 mio. kr.-it selskabsskat inuiaqatigiinnut akiliutigineqarput.

KNI 800 missaanniittunut suliffissaqartitsivoq ukiullu tamaasa 85 mio. kr. aamma 110 mio. kr.–it naliginut sanaartornermut atortarlugit.

Siulersuisunut ilaasortat Bodil Nyboe Andersen, Annette K. Sadolin, Høgni Hansen aamma siulersuisut siulittaasuat Niels Thomsen ataatsimeersuarnermi qinigaaqqipput. Nutaatut qinerneqarput Najaaraq Kreutzmann Christiansen aamma Søren Jakobsen.

Deloitte, Statsautoriseret Revisionsaktieselskab, suliffeqarfissuup kukkunersiuisuisut qinerneqaqqipput.

KNI-p siulersuisuisa KNI-mi pisisartut, sulisut niuernikkullu suleqatigisat tamaasa qutsavigivaat.

____________________________________ 

• KNI A/S-imut ukioq naatsorsuiffiusoq tassaavoq1. april – 31. marts. 

Ukiumoortumik nalunaarut 2015/2016 - KNI A/S uani aaneqarsinnaavoq.