KNI qorsuunerusoq

Uuliap puukuinik utertitsisarneq

”Nunarput pinnersoq issittumilu pinngortitaq immikkuullarissoq tulluusimaarutigaavut – taamaattumik aamma pinngortitap innarlitsaalineqarnerani immitsinnut pisussaatittariaqarpugut.

Kalaallit Nunatsinni takussaaleriartuinnarpoq plastikkit allallu eqqakkat immami nunamilu inunnit piliarineqarsimasut.” Taamatut oqarpoq KNI-p pisortaanera Peter Grønvold Samuelsen.

”Taamaattumik siunissaq qorsuunerusoq anguniarlugu ulluinnarni inuunitsinni piujuaannartitsinissamik atoqqiinermillu eqqarsartariaaseqarnerulertariaqarpugut. KNI-mut atatillugu piffissamut nutaamut ikaarsaariarpugut, niuernermik ingerlataqarnitsinni avatangiisit innarlitsaaliorneqarnissaannik eqqarsarnerulernissatsinnut. Pisisartugut avatangiisinut innarlitsaaliueqataanissaminnut periarfissaginnerulersikkusuppagut. Maanna pinngortitap mingutsaaliorneqarnissaanut periarfissat arlallit iliuuserilerpagut.

Neriuutigivarput ulluinnarni plastik-imik atuinikinnerulernissamut tamatta peqataajumaartugut, plastik-illu atukkagut pinngortitamut igiinnarneqaratik katersorneqartarnissaat atoqqinneqartarnissaallu qulakkeerniartassagipput. Tamanna KNI-mit peqataaffigerusupparput, taamaattumik motorolie-t Texaco-meersut puukuinik utertitsisoqartalernissaa atortuulersilerparput. KNI A/S-imi pisortaaneq Grønvold Samuelsen oqaluttuarpoq.

Uuliap puukui plastikkiusut utertinneqarsinnaasalissapput

”11. november 2019 aallarnerfigalugu KNI motoroliat Texaco-meersut puukuinik Pilersuisumi Polaroil-imiluunniit pisiarineqarsimasut utertitsiffiusinnaalissaaq. Motoroliat gearoliellu puukua ataaseq 3 kr.-ninnassutigineqarsinnaalissaaq utertikkaanni. Puukut plastikkiusut allat utertinneqarsinnaapput, taakkuli utertitsinermut aningaasannassutaasinnaassanngillat. Aaqqissuussineq una nioqqutissat akiinut sunniuteqassanngilaq, utertitsisisalernerli KNI-mit tamakkiisumik nammanneqassaaq, KNI-p qorsuunerulersitsiniaqataaneranut akiliutigineqassalluni.”

Plastik atorunnaariartortinneqassaaq

”Plastikkit pisariaqanngitsut Pilersuisup pisiniarfiini annikillisarneqassapput. Nerinermi atortut ataasiartakkat, soorlu imerfiit puugutaasallu plastikkiusut qanittumi atorunnaassapput. Taarsiullugit ataasiartakkat tamakku plastikkimik sananeqaateqanngitsut tuniniarneqalissapput. Puuguttat imerfiillu bambus-imit sananeqaateqassapput, saviit ajassaatillu qisummeersuussallutik. Pappiaqqat allarutit (servietter) qarsorsaasersugaassanngillat.

Pilersuisup pisiniarfiini aamma puussiat plastikkiusut atorunnaarput, taarserneqarlutillu puussianit sananeqaatsimikkut 1/3 plastikkiusunit, 1/3 plastikkimi atoqqitanit kiisalu 1/3 naasut fiberiinit. Puussianik plastikkiusunik atuiumanngilluinnartunut pisiniarfiliutit bomuld-imit sanaajusut KNI-p ilisarnaataanik nanutalinnik pisiassaqalissaaq.” Taamatut oqaluttuarpoq KNI-mi pisortaaneq.