Dansk
English
KalaallisutSuliffeqarfissuarmi KNI-mi periusissiamik ukkassilluni suliaqarneq ukiup affaanut naatsorsuutit naatsorsuutigineqartutut angusaqartitsipput
Piffissaq naatsorsuiffiusoq pineqartoq tassaavoq: 1. april – 30. september 2020
Piffissami angusat
KNI ukiumi naatsorsuiffiusumi 2020/21-p affaani siullermi akileraarutit akilinnginnerini 56,0 mio. DKK-nik angusaqarpoq ukiumi naatsorsuiffiusumi siuliani 2019/20-mi angusat 74,1 mio. DKK-sut. Angusat missingersuusiornermi angusarineqartussatut naatsorsuutigineqareersut anguneqarput.
KNI A/S-ip naatsorsuutigaa ukiumi naatsorsuiffiusumi 2020/21-mi ukiup affaani kingullermi angusassatut naatsorsuutigineqartut anguneqarumaartut, taamaalilluni ukioq tamakkerlugu akileraarut sioqqullugu 108 – 118 mio. DKK-nik sinneqartooruteqarnissaq siunertaareersutut anguneqarsinnaassalluni, tamatumanili Covid-19-ip kinguneranik sunniutaasussat suli suussusersineqanngitsut apeqqutaajumaarput.
Nunarsuarmi tamarmi Covid-19-imik nappaalanersuaq malinnaavigeqqissaarneqarpoq kiisalu ukiup naatsorsuiffiusup sinnerani aningaasaqarnikkut sunniuteqarsinnaanera minnerpaamiitinniarlugu suliniutit pisariaqartut suliniutigineqarnerat ingerlanneqaannassaaq.
Ukiuni siuliini naatsorsuutini kukkunerujussuit iluarsiivigineqarnerat
Suliffeqarfimmi namminerisamik aningaasaatit ulloq 31. marts 2020-miit atuutilersumik – tassalu ukiup naatsorsuiffiusup 2020/21-p affaata aallartinnerani - akileraarutit akilereerlugit 50 mio.
DKK-nik nalikillineqarput. Nalikilliliineq pissuteqarpoq suliffeqarfiup uninngasuutaanik ukiuni kingullerni qulingiluani nalilerneqartarnerat kukkuneqartarsimammata.
Nalilersueqqissaarluni misissuinermi paasineqarpoq kukkunerup annersaa aallartissimasoq ukiuni naatsorsuiffiusuni 2011/12-imi aamma 2012/13-imi. Ukiunimi naatsorsuiffiusuni taakkunanni suleriutsini nioqqutinullu paasissutissanut tunngasuni eqqortumik suliaqarsinnaaneq KNI-mi assut ajornartorsiutaanikuuvoq. Tamannarpiaq ukiuni naatsorsuiffiusuni pineqartuni naatsorsuutini kiisalu kukkunersiuisut nalunaarsugaanni sukumiisumik nalunaarutigineqarnikuuvoq. Kukkunerup ukiuni taakkunanni naatsorsuiffiusuni qanoq agguataarsimanera qularnaatsumik naatsorsorneqarsinnaasimanngilaq, tassami ukiuni taakkunanni systemit atorneqartut suleriutsillu assut amigaateqarsimapput.
Nalilersueqqissaarluni misissuinermi paasineqarpoq uninngasuutinik nalilersuinermi kukkussutaasimasut aningaasartaat eqqarsaatigalugit ukiumi naatsorsuiffiusumi 2013/14-imi patajaallisimasut, ukiumiillu naatsorsuuteqarfiusumiit tassanngaanniit quimi uninngasuutinik naatsorsuinermi naatsorsuusiortarneq ERP-mi quinik uninngasuutinik nalilersuinermi systememi atorneqartumi suliaqartarneq taannaasimasoq kukkuffiusarsimasoq.
Kukkussutaasimasup sunniutaa akileraarut ilanngaatigereerlugu 50 mio. DKK-iusup sunniutaa imatut erseqqissarneqarsinnaavoq:
- Ukiuni naatsorsuiffiusuni 2011/12 – 2012/13-imi angusanut sunniutaa (ukiut naatsorsuiffiusut marluk) akileraarutit akilereerlugit 36 mio. DKK-nut naatsorsorneqarput
- Ukiuni naatsorsuiffiusuni 2013/14 – 2019/20-mi angusanut sunniutaa (ukiut naatsorsuiffiusut arfineq-marluk) akileraarutit akilereerlugit 14 mio. DKK-nut naatsorsorneqarput
Arlaannaannulluunniit attuumassuteqanngitsut misissuinissaat
Uninngasuutit naatsorsorneqartarnerannut Deloitte-miit nalunaarusiarineqartoq siulersuisunut saqqummiunneqarnikuuvoq. Naatsorsuutit kukkuneqarsimanerinik kiisalu peqquserluttuliortoqarsimannginneranik nalunaarusiorneq siulersuisut tusaatissatut tiguaat.
Quini uninngasuutit naatsorsorneqartarneranni kukkusoqartarsimaneranik suliffeqarfiup paasisaqarareernermini aalajangiuppaa kukkusarsimaneq misissoqqinneqassasoq, tamatumuunakkullu misissuineq kukkunersiuisunik suliffeqarfimmut attuumassuteqanngitsunit ingerlanneqassaaq. Siulersuisut pisortallu nalilerpaat misissuineq maannakkut ukiup affaanoortumik nalunaarummut sunniuteqassanngitsoq.
Siulersuisut aamma utaqqivaat KNI A/S-ip politiinut nalunaarutigineqarneranit politiit qanoq aalajangerumaarnerat.
Annertunerusumik paasisaqarusukkaanni pisortaaneq Peter Grønvold Samuelsen mailimut pgs@kni.gl sianerfigaluguluunniit oqarasuaammut +299 55 37 03.
---
- KNI A/S-imi ukioq naatsorsuiffiusoq tassaavoq 1. april – 31. marts.
