KNI-mi suleqat tatigineqarluartoq nersornaaserneqartoq

Novembarip 7-iani 2017, KNI-p ataqqinartorsuup Dronningip nersornaasiuttagaanik Fortjenstmedalje-mik sølviusumik suleqat nuannarineqarluartoq tatigineqartorlu, Frederik Kristiansen saqqarmiulerneqarpoq.

KGH-mi KNI-milu ukiuni 40-ni sullissilluarsimasoq, sølvimik nersornaaserneqarnera nalliuttorsiulaarutigineqarpoq.

Frederik Kristiansen KGH-mi KNI-milu katillugit ukiuni 40-ni Upernaviup eqqaani Tasiusami piffissallu annerpaartaani Uummannami sulisimavoq, sulilu peqqilluni sulilluni.

KNI-mi pisortaanerup Peter Grønvold Samuelsen-ip KGH/KNI-mi ukiorpassuarni sulisuusimasup Frederik Kristiansen-ip nalliuttorsiutigineqarnerani ataqqinartorsuup Dronning Margrethe-p aappaata nersornaasiuttagaanik Fortjenstmedalje sølviusumik saqqarmiulerpaa.

-Fari sulisartoqarnermut tunngasunik pingaartitsisuunerata ersersittarpaa, sulisut aamma illersorneqarnissaannik pingaartitsisuugami, sulisut sinniisaattut ukiuni arlaqalersuni qinigaasarpoq, taassumallu saniatigut aamma sullivimmi isumannaallisaanermi sulisut qinigaattut ataatsimiititaliamut ilaasortanngornikuuvoq qinersivimmi kingullermi, tassuuna takuneqarsinnaavoq suliffeqarfiup pitsaasumik ingerlanissaanut pingaartitsisuunera, KNI´p pisortaanera ilaatigut taama oqarpoq.

Niuertorutsimit suliartoqqusaasoq
Fari inunngorsimavoq Upernaviup napparsimaviani maj-ip 30-ani 1962. Taamanikkut Upernaviup nunaqarfiani Tasiusami najugaqarput ilaqutariit Kristiansenikkut.

Fari suli Tasiusami meeqqat atuarfianni atuartuusoq niuertorutsimit Jørgen Nielsen-imit KGH-p pisiniarfianut suliaqartoqqusaasimavoq 4.maj 1975-mi.

Fari ukiuni tallimangajanni Tasiusami ataannartumik sulisooreersoq ilaqutariit Uummannamut nuuttussanngormata niuertorutsip Juulup Fari Uummannami KGH-mi sulilersinnaanissaanut qinnuteqaassussimavaa tassalu Fari augustimi Uummannami KGH-mi quersuarmi sulilerpoq.

Fari ukiuni suliffigisamini inuppassuit suleqatigisarsimavai, Farillu nammineq pingaartittuarsimavaa sulileqqaarami ilikkarsimasani, suliffimmi eqiasuinneq, suliffimmut sulisitsisumullu unneqqarissuuneq kiisalu pikkorissarnisamut periarfissat atorluartarsimavai.

Nersornaasiineq Uummannap katersugaasiviani alianaatsumi Farip qanigisarpassuinik suleqataanillu najuuffigilluarneqartumik ingerlanneqarpoq. Jens Gustav Levisen-ilu Maniitsumeersoq appisimaartinneqarpoq. Fari nuliaqarpoq marlunnillu qitornaqarput, qulingiluanillu qatannguteqarluni.