KNI niuffanneq Ilulissani iluatsilluartoq

Arfininngormat ulloq 10. Juni 2017 KNI A/S-ip Ilulissani niuffatsitsinera inunnik ornigarneqarluaqisoq iluatsilluartumik naammassineqarpoq.

Timersortarfiup silataani Iluliarmiorpassuit matup ammarnissaanut utaqqerrapput, ammaannavissorlu pisiortorlutik aallartillutik.

Pisortaaneq Peter Grønvold Samuelsen KNI-p Niuffatsitsinera ammarlugu ilaatigut ima oqaaseqarpoq:

- Siorna maani Ilulissani Niuffatsitsinerput assut nuannaralugu suli eqqartortarparput, neriuppugullu minnerpaamik siornatulli nuannertigisumik maani Iluliarmiut peqatigalusi niuffatsitsiumaarluta, Peter Samuelsen Grønvold oqarpoq, nangillunilu:

- KNI-mi sulisorpassuit sineriammeersut maaniipput Niuffatsitsineq una piviusunngortissinnaajumallugu. Atortorpassuit nioqqutissarpassuillu illoqarfinni Niuffatsitsivissatut tullinnguuttunut nassiussuunnissaat, poortornissaat, puuiarnissaat assartornissaat, kusanartumik ilioqqarnissaat il.il., angalanerillu eqqarsaatigalugit – suleqatikka oqarfigerusuppassi – pikkoreqaasi, suleqatigiillaqqeqaasi, kivitseqatigiillaqqeqaasi – Nunatsinni taamatut pisoqaraangat suleqatigiinnikkullu kivitseqatigiittoqaraangat tamaannatta nuannaartarniarta, qutsavissallu qutsavigalugit. Suleqatikka qujanarsuaq, Peter Grønvold Samuelsen naggasiivoq.

Niuffatsitsinermi tuniniarneqartut siornarniit amerlanerupput inunnit alutorigineqarluartunik. Qillertuusat saaliaqutit allallu KGH-mik allannillit inunnit assut ussatigineqarput, akiliiniarlutillu siuleriippassuanngortarlutik. Tuniniarneqarput aalisarnermut tunngasut, Neqi A/S-imit savap neqaanik nerisassiat assigiinngitsut, KNI Engros-imit suliffeqarfinnut atortut Pilersuisumiillu nerisassat assigiinngitsorpassuit. Timersortarfiup silataaniipput umiatsiat assigiinngitsut, Poca-llu pisiariumaneqaqaat sivitsunngitsorlu tamarmik tunillutik. Siorna soqutigineqarluartoq Pølsevogni kingumut inunnit ornigarneqarluni pølsinik assigisaannillu pisiniartarput.   

Meeqqat ballonngit nuannareqaat, candyflossit mamarsaatigeqaat minnerunngitsumillu KNI-p maskotsii nannut marluk qimappiassanagit sammineqartarlutik. Nalunaaqutaq marlunut kikkunnulluunniit soqutiginnittunut arpatsitsisoqarpoq, piumasut pisuttuarlutik cykelerlutillu. Peqataasut tamarmik imerfimmik pinnatsinneqarput.

Niuffannermi akunniliisarlutik aliikkusersuisuupput nuannarineqarluartut NAIP.

KNI-mi sulisut 40 missaanniittut leverandørillu 10 missaanniittut suleqataapput. Leverandørit Niuffatsitsinissarsuaq sioqqullugu tuniniakkatik pillugit pikkorissaapput tuniniaariaaserlu aamma sulisunut pikkorissaassutigineqarluni.

Maajip qaammataani Sisimiuni niuffanneq ingerlanneqarpoq, maannalu tullinnguupput Upernavik 1. juli, Uummannaq 17. juli kiisalu Tasiilaq 2. september.