KNI A/S-ip SSP Arpattartut aningaasaliiffigisarnissaanik isumaqatigiissuteqarfigaa

KNI A/S SSP Arpattartullu aningaasaliinissamik 1. januar 2021-miit 2023-p naanerata tungaanut atuuttussamik ulloq 7. januar 2021 isumaqatigiissutigaat.

SSP-ip sisoraatinik arpalluni ineriartortuarnissaa KNI-p tapersersorusuppaa siuarsaaqataaffigerusullugulu. SSP Arpattartut suliniutaat KNI-p ukkatarisaanut atalluarput tassa KNI-p isumaginninnermut, kulturimut timersornermullu tunngasunut ukkatarinnippoq, SSP Arpattartullu pikkorinnerpaat ilaattut unammisartutut peqataajuarnissaat KNI-p kissaatigaa, aammalu meeqqat inuusuttullu ineriartortinneqartuarnissaanni suliniuteqartuaqqullugu.

SSP Arpattartut oqaatsit ilisarnaatitut atortagai tassaapput ’nuannaarneq, ataatsimoorneq peqqinnerlu’, peqqinnerlu eqqarsaatigalugu annertuumik aaqqissuussaqartarput, meeqqat immikkut ukkataralugit.

SSP Arpattartut ukiut tamaasa Miki ACR aaqqissuuttarpaat, Arctic Circle Racemut atatillugu meeqqat unammitittaramikkit. Taassuma saniatigut ukiukkut sapaatip akunnerata naanerani qaammatit tamaasa Nalunnguarfimmi meeqqanut arpaatinik sammisaqartitsisarput. Taakku nuannarineqarluartarput, arpaatertoqareeraangallu SSP Igloomut kakao-imik kissartutuuttarput vaffelituutigalutik.                           

Upernalernerit tamaasa SSP Arpattartut suliffeqarfiit stafettertittarpai, tassani Sisimiuni suliffeqarfiit assigiinngitsut qaaqquneqartarput, suleqatitik allatut nuannersumik ataatsimooqatiginissaannut periarfissinneqartaramik.

Juunimi Meeqqat Ulluani SSP Arpattartut aamma tivolertitsisarput. Taanna nuannarineqartaqaaq, pinnguaatit unammissutillu assigiinngitsut, soorlu tombola, darterneq pinnguaatersorlunilu aallaasersorneq aliikkutarineqarluartaramik. Ukioq allortarlugu SSP Arpattartut Norgemut aamma angalatitsisarput, ujakkaarluni Danmarksmesterskabinut peqataasaramik.

SSP Arpattartut Meeqqat Ulluanni tivolertitsisut.

SSP Arpattartut Norgemi Danmarksmesterskabinut peqataasut.

Meeqqanut sisorartitsineq.

Aningaasaliinissamut isumaqatigiissut 7. januar 2021 KNI’p Kiffartuussiviani atsiorneqarpoq, SSP Arpattartunilu siulittaasup Emilie Olsenip aningaasaliineq nuannaarutigaa:

”Peqatigiiffitsinni nammineq kajumissuserput aallaavigalugu meeqqanik, inuusuttunik allanillu sunngiffimmi peqqinnartumik inuunerinnartumillu sammisassaqartitsiniarneq ukkapparput. Meeqqat inuusuttuaqqallu sisoraatinik arpalluni timersuummik ineriartornissaannik aqqutissiuuttarpagut, assersuutigalugu timersorluni qaffasissumik unammeqataasinnaanissaannik tapersersorlugit. Taamaattumik suliffeqarfiit KNI-iikkutut ittut nammineq kajumissuserput atorlugu suliniarnitsinni tapersersuisinnaanerat nuannaarutigaarput. Tapersersorneqarnissaq pisariaqartittorujussuuarput. Aasaq manna sisoraaserivipput serlersaarfigineqarmat ukiuni arlalinni ineriartortitsisimanerput annertuumik kinguariartinneqarpoq.”

 KNI-p Pisortaanera Peter Grønvold Samuelsen, atsioqatigiinnermi ima oqaaseqarpoq:

”SSP-mi ujakkaartartut sunngiffitsik atorlugu suliniuteqarnerat KNI-miit nuannaarutigalugulu tapersersorparput. Meeqqat inuusuttullu suliniarfigineqartarneri tapersersorpagut. SSP-mi suliniarneq tapersersorsinnaagatsigu KNI A/S-imiit nuannaarutigaarput.