Frederik Petersen aamma KNI A/S aningaasaleeqataanissamut isumaqatigiissuteqartut

Timersortartoq Iluliarmiu Frederik Petersen KNI A/S-imit aningaasatigut tapersersorneqalerpoq.

Isumaqatigiissut atsiorneqarpoq tallimanngornermi 24. august 2018 Ilulissani.

Frederik Petersen sisoraatinik ujakkaartartuuvoq pikkorissoq Nunatsinni pissartanngorniunnerni Arctic Circle Race-milu peqataasarnermini angusarissaartartoq. Frederik Petersen aamma aqqusinikkut nunakkullu arpannermik ingerlataqartuuvoq, unamminernilu peqataasarluni angusarissaartarlunilu, soorlu Aasianni unnuakkut Marathon-imi, Oqaatsuniit Ilulissanut Cecilie løb aamma Ilulissat eqqaanni sumiissusersiorluni arpanneq ullunik pingasunik sivisussuseqartartoq Kangia Race peqataaffigisarlugit.

Isumaqatigiissut ukiuni marlunni atuutissaaq. Isumaqatigiissut naapertorlugu Frederik Petersen sisoraatinik, timersornermi atisanik, akiliunneqarluni angalanernut aningaasanillu tunineqartassaaq. Isumaqatigiissut aamma imaqarpoq, peqataaffigisamini angusarissaaraangami aningaasaliiffigineqarnerusinnaassalluni.

Paasissutissat annertunerusut pineqarsinnaapput:

Adm. Direktør KNI Peter Grønvold Samulesen oqarasuaat 862300 imlt. 553703
Frederik Petersen oqarasuaat 27 53 84