KNI A/S angerlarsimaffeqanngitsunut Meqqusaalimmeersunik tunissuteqarpoq

Salon Inuit Sisimiuni angerlarsimaffeqanngitsunut aappassaaneerlutik akeqanngitsumik killuillutillu assigiinngitsunik tunissuteqassapput. Suliniutaat kusanartoq taperserlugu Meqqusaalimmiit atisanik oqortunik tunissuteqarpugut.

KNI-p pisortaanera Jeppe Jensen ullaaq manna Salon Inuimmut aqqusaarpoq, tassanimi piginnittut arnat marluk, Inooraq Heilmann Kreutzmann aamma Emilie Dahl Lennert, Sisimiuni angerlarsimaffeqanngitsut akeqanngitsumik killussamaarpaat. Siorna aamma taamaaliorput. Taassuma saniatigut namminneq piumassusertik aallaavigalugu suliffeqarfiit pisiniarfiillu angerlarsimaffeqanngitsunut tunissuteqarsinnaanersut saaffigisimavaat.

Jeppep karsit angisuut marluk nassarpai, taakku Meqqusaalimmeersunit atisanik oqortunik imaqarput. Inooraq Heilmann Kreutzmann KNI-p taamatut tunissuteqarnera attortissutigaa. Taassumammi angerlarsimaffeqanngitsut qanoq ikiorsinnaanerlugit ukiorpaalunni eqqarsaatigisarsimavaa.

- Angerlarsimaffeqanngitsut uummatinni initoorujussuupput, nuannaarutigeqaaralu pisiniarfiit suliffeqarfiillu assigiinngitsut suliniutitsinnut tapersersuimmata. KNI-p tunniussaanut qujamasuttorujussuuvunga, qularinngilaralu issersuup takkuttussap nalaani iluaqutaalluarumaartut, Inooraq oqarpoq.

KNI-p pisortaanera tapersiivoq:
- Suliniutaat torrageqaara, taamaattumillu aalajangersimavugut ukiorsiutinik Meqqusaalimmeersunik tunissuteqarniarluta, ukiorsiutit kavaajat, annoraat qarlippaallu tunniuppagut.

Jeppemummi pingaarpoq ikiuussinnaaffitsigut ikiuuttarnissarput.

- Meeqqakka oqaluttuuttarpakka inuit tamarmik nuannersumik juullisiorneq ajortut. Angerlarsimaffeqanngikkaanni pissakillioraannilu imaassinnaasoq juulli aatsaat iluamik artornarnerulertartoq, ikiuussinnaaffitsinnilu ikiuuttarutta allanngueqataasinnaavugut, oqarpoq.

Sisimiuni angerlarsimaffeqanngitsut naatsorsorneqarsimasut 14-iupput, Salon Inuiullu angerlarsimaffeqanngitsut akeqanngitsumik killortinnissaannut pingasunngorpat periarfissippai, tunissutillu assigiinngitsut, ilaatigut KNI-mit, aamma tunniutissavaat.

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl