Nappaassuaq kræfti akiorlugu

Nappaassuaq kræfti akiorniarlugu Neriuffik nuna tamakkerlugu KNR TV-iikkut toqqaannartumik aallakaatinneqartumik arfininngornermi 3. november 2018 Nuummi Katuamiit aallakaatinneqar-mat KNI A/S DKK 100.000,-nik pajuppoq. Aningaasat allagartaat KNI A/S-imi siulittaasumit Lars Borris Pedersen-imit Neriuffiup siulittaasorigallagaanut Birthe Kielsen-imut pajugutigineqarpoq, pajugutisisullu nuannaaqaat qujaniaqalutillu. Tunisisut allattorsimaffiatigut takuneqarsinnaavoq aamma KNI-mi sulisut katersuiniaqataasimasut. KNI A/S siullermiilinngilaq nappaassuarmut kræftimut akiorniarluni aningaasanik katersuiniarnerni peqataalluni. 2014-imi martsimi Sisimiuni Kiffartuussivimmi sulisut katersuiniaqataanikuupput, sineriammilu sulisut aamma taamatut, taamanikkut katillugit DKK 487.885,-it KNI-p katersuiniarnermut tunniuppai, tassa ilaatigut tujuuluaqqat assigisaasalu Pilersuisup pisiniarfiini tuniniarneqartussat pisiarinerini naligi ilanngullugit.