Kajumissaasiineq

KNI A/S-imi Ilusilersuisartoq Paarnaq Larsen Mølgaard aamma Nioqqutissanut Pisortaq Nanna Lynge Lennert, nutaaliaasumik eqqarsarlutik suliaminnut KNI-nillu qitiutillugit pingaartitaat ersersilluarsimanerannut kajumissaaserneqarput.

Tallimanngorneq 1. december 2017 KNI A/S Sisimiuni sulisuni tamaasa Kiffartuussiviup Nerisarfianut qaaqqusimavai, arlariiaanik tupaallatsitsinertalimmut.

Pisortaanerup tikilluaqqusilluni oqaaseqarnissaa sioqqullugu, tupaallatsitsinikkut naatsorsuutigineqanngi-vissortumillu kajumissaaserneqartussat marluk ilaqutaat Nerisarfimmut apuutereersimapput, ilaatigut aam-ma isersimaqataalluni Qeqqata kommuneqarfiani borgmesteri.

Kalaallit inuunerat ilorleq
Nerisarfik pinnersarneqarsimavoq, kalaalerpaluttut nioqqutissat nutaat kusanartumik saqqummersinneqar-simallutik assillu nipilersuutitalerlugit alutornartumik seqersittaammik ingerlaartinneqarlutik.

Peter Grønvold Samuelsennip kissaatigaa KNI nutaaq pikialaarfiusariaqartoq - nutaaliornermut, nutaamillu eqqarsarsinnaanermut. Taamaaliornikkut – kalaallit inuunerat ilorleq paasillugu ataqqillugulu – Nunatsinni nunarsuarmioqataanitsinni ineriartoqataasinnaanerput takutissagatsigu.

- Pisisartut pisariaqartitaat aallaavigalugit kalaallit inuunerat ilorleq paasillugu ataqqillugulu nutaamillu eq-qarsarluni sulisoqarnissaanik pilliuteqartoqarnissaanik ineriartortitsisoqarnissaanillu KNI-p aqutsisuinit piu-masaqarneq suleqatitta ilaasa pikkorissut akisussaaqataanerminnik ersersitsillutik paasinnillutillu suliaasa ilaat maani takusinnaavagut. Paarnaq Larsen Mølgaard aamma Nanna Lynge-Lennert – kaperlaap nalaani ullorissatut ikualasutut takutippusi, KNI-mi pisortaaneq ilaatigut oqalugiaammini ilaatigut taama oqarpoq.

Kajumissaasiinerup malittai
Nioqqutissanut pisortaq, Nanna Lynge Lennert KNIp atisanut meqqertaava, Meqqusaalik aamma suliat allat avammut suaarutigineqanngitsut pilersitarai nammineerluni.

Ilusilersuisartoq, Paarnaq Larsen Mølgaard kalaallit inuunerat ilorleq naleqartitagut inuusaaserput paasilluarsimavai, tamannalu ilaatigut takutippai KGH-mit isumassarsiorluni annoraaminernik, marrannillu ilusilersuinikkut.

Sulisut taakku marluk tupaallaatigeqisaannik kajumissaasiineq 10.000 koruuninik malitseqarpoq.

- Tulluusimaarnarpusi suleqatigalusi, tulluusimaarutissaqarpusi – nuanneq ilissitut ittunik suleqateqarluni. Qujanarsuaq, pisortaanerup oqalugiaatini taamak naggaserpaa.