Julie Jensen Fortjenstmedalje sølviusumik saqqarmiulerneqarpoq

Direktionssekretær Julie Jensen 1. august 2019 KNI-mi ukiuni 40-ni atorfeqarsimanermini nalliuttorsiorpoq. Tamannalu nammineq kissaataa naapertorlugu tallimanngornermi 23. august 2019 KNI-p Sisimiuni Kiffartuussiviata Nerisarfiani kusanartumik, ilaqutai suleqaterpassuilu najuuttoralugit malunnartinneqarpoq.

Ullumikkut aamma 21. oktober 2019 ukiorpassuarni aalajaalluni atorfeqarsimanini pissutigalugu ataqqinartorsuup Dronning Margrethe-p aappaata nersornaasiuttagaanik Fortjenstmedalje-mik sølv-iusumik saqqarmiulerneqarpoq.

KNI A/S-ip pisortaanerata Peter Grønvold Samuelsen-ip Fortjenstmedalje sølv-iusoq Julie Jensenip sakiaanut ikkuppaa.

”Ullumikkullu kingumut katersuuppugut ataqqinartorsuup Dronning Magrethe aappaata ukiorpassuarni suliffimminni aalajaallutik sulisimasunut nersornaasiuttagaa Fortjenstmedalje Julie-mut saqqarmiuliutissagatsigu.

KNI A/S-imi pisortaqatigiit suleqaterpassuatillu sinnerlugit Julie ilaquttatillu pilluaritsi. Qujanaq ukiorpassuarni suliffigisannut ilumoorlutit tunniusimallutillu kiffartortuaravit. Ukiorpassuarni illit pisortarisarsimasarnut suleqaterpassuannullu sutigut nalliuttorsiortoqaraagat kiffartortuartuusarputit, ullumili illit ilaquttatillu misigissavat inuunermi suliatit pillugit qujaniarfigineqarneq.” Peter Grønvold Samuelsen ilaatigut taama oqaaseqarpoq.

Pisortaaneq oqalungiareermat Julie nammineq maniguulluni killitsisimaarlunilu qujassuteqarpoq, suliffeqarfini, minnerunngitsumillu ilaquttani ulluinnarni tapersersortigillluakkani, qamannga pisumik qujassuteqarfigalugit.

Nersornaaserneqartoq KNI A/S-imit aamma tunissutisivoq, tassalu tuttup quttoraa.

Julie Jensen ilaqutaalu.