Jens Aqqaluk Brandt KGH-mi KNI-milu katillugit ukiut 25-nngorlugit nalliuttorsiorpoq

Polaroil-imi nunap immikkoortuanut aqutsisuusoq Jens Arkaluk Brandt marlunngornermi 1. oktober 2019 ukiuni 25-ni atorfeqarsimanermini nalliuttorsiorpoq.

Nalliuttorsiorneq kusanartumik malunnartinneqarpoq ullormi nal. 14:00 aallartittumik Qasigiannguani Pilersuisup pisiniarfiata qiteqquttarfiani, ilaqutai suleqataalu najuuttoralugit.

Nalliuttorsiortumut uppernarsaammik tunniussisuuvoq suleqaterput Karl Samuelsen, pisiniarfimmi souschefi.

Karl Samuelsen malunnartitsineq aallarnerlugu tikilluaqqusereerami ilaatigut imatut oqaaseqarpoq:

”Ukiuni 25-ni sulisimanerni pilluarit, sullinneqartugut pissusissaannaatut isigisarparput nioqqutigineqartunik (diesel, petroleum, benzin) ullut tamaasa pisiniarsinnaasuarnerput, taamaattussaannartut isigalugu. Annerusumillu eqqarsaatigineq ajunnguatsiarparput, pilersuineq tamanna pitsaasumik akilersinnaasumillu naammassiniarlugu sulineq qanoq ittoq naammassineqaqqaartartoq, suliaq torersumik kusanartumik, pitsaasumillu naammassineqassappat aqqusaarneqarsimassasoq”

Kingorna Polaroil-imiit, Driftschef Gerth Jack Storer-ip oqaaseriumasai Karl Samuelsen-imit nalliuttorsiortumut apuuneqarput, ilaatigut imatut imaqartut:
“Asasarput Jens Aqqaluk
Siullermik sulilersimavutit 01. maj 1989 KGH-mi.
Oktobarip aallaqqaataani 1998 Qasigiannguani Ikummatissaasivimmi sulilerputit, kingornalu ukiut arlallit qaangiuttut Ikummatissaasivimmi aqutsisunngorlutit.

Jens Aqqaluk, suleqatikkuminartuuvutit sunut tamanut sapinngisaannut ikiuukkumatuujullutit, akisussaaffitit annertusartuarpatit nunaqarfiit eqqarsaatigalugit, nunaqarfiit akisussaaffitit marluinnaasut ingerlakkaluariarlugit aamma marlunnik ilaqqipatit, tassalu Ikamiut, Ilimanaq, Akunnaaq Kitsissuarsuillu nunaqarfiutigilernikuullugit ulloq manna tikillugu.
Naggataatigut KNI A/S Polaroil sinnerlugu qujarusuppunga, aalajaatsuunerit tatiginartuunerillu pillugu ukiuni 25-ni KNI-mi sulisimanernut, tamannalu pillugu qamannga pisumik pilluarit aammattaaq ilaquttatit pilluaqqorusuppakka, naggataatigullu siunissamik ajunnginnerpaamik kissaallusi”.

KNI A/S-imi Pisortaanerup Peter Grønvold Samuelsen-ip oqaatigiumasai aammattaaq nalliuttorsiortutumut apuuneqarput:

”Jens Arkaluk Brandt pilluarit suliffeqarfissuatsinni ukiuni 25-inngortorsiorninni.

Qujanaq aalajaallutit tunniusimallutillu suliffipput inerisaqataaffigigakku. Naatsorsuutigineqarsinnaasut ilagaatsit, ikiuukkumatuujuvutit maligassiuisuullutillu.

Tamanna KNI-p iluani, ingammillu Polaroil-ip iluani takussutissarpassuaqarpoq. Qasigiannguani Ikummatissaasivik paarilluarpat, suliffeqarfik torersoq avataaniit tikittunit nuannaarutigineqarluni tupaallaatigineqartartoq, eqqiluingaarmat toringaarmallu.

Aasaq manna KNI-mi Suleqatitsialattut toqqarneqarputit tamatumunngalu atatillugu pisortaanermit oqaatsit makku ilaatigut atorneqarput: Jens Arkaluk KNI A/S-imi sulisut pitsaanerpaartaannut ilaavoq, pitsaanerpaajunngikkuni. Suleqatiminit Polaroil-imilu aqutsisunit tatigineqarluinnartuuvoq.

Inuk eqqissisimasuuvoq, nipaatsuuvoq imminullu sorsuakkiarisuunani. Taamaakkaluartoq suleqatiminut qaninnerusaminut qiimmassaqatigiissitsisinnaanermut tunuarsimaartuunani. Ikiuiumatulluinnartuuvoq aamma Qasigiannguani Pilersuisorluunniit eqqarsaatigalugu.

Qasigiannguani ikummatissaasivimmut takuniaasimasut nalunngilaat ikummatissaasivik qanoq torerluinnartigalunilu eqqiluilluinnartigisoq. KNI A/S-imi suliffeqarfissuarmi tamarmi Qasigiannguani  ikummatissaasivik tassaavoq eqqiluinnerpaajullunilu torernerpaajusoq. Jens Arkaluk aalajaatsuuvoq suliffimminullu ilumoortuulluni.

Tunuarsimaartanngilaq suleqatiminik ilinniartitsinissaminut, suliaminut ineriartuutaasinnaasunut soqutiginnittuullunilu paasisaqarusuttuuvoq. Jens Arkaluk taamaakkami maligassiuisuuvoq.

Qujanarsuaq aasaq manna Ittoqqortoormiini ikummatissaasivilerisoq maani tikeraartorigakku aammalu illit nammineq Ittoqqortoormiini taanna suleqatigiartorlugu. Taamaaliorneq suliffeqarfiup ilua-ni ineriartortoqartuarnissaanut aqqutissaavoq.

Tallimanngormat aamma Ikummatissaasivilerisunngorniarneq pingasunik immikkoortortalik naammassivat angusiffigalugulu. Pilluakutsoorit. Jens Arkaluk, ilaquttatillu ullorsiorluarnissarnik kissaappagit”.

Naggasiullugu Jens Arkaluk qujassuteqarluni oqaaseqarpoq imatut:

”Ullaaq manna iterama eqqaamanarput piffissap ingerlanerani suleqatigisimasat suleqatillu. Ukiut 25-t misinnanngeqaat, tamatuma ersersippaa suliffik nuannaralugu qanoq ittoq.

Nuliara Hanne tapersersuisuarneranut quttavigerusuppara, aammalu suleqatikka, maannalu Polaroil Qasigiannuani suleqatiga Nikkulaat, neriuppunga suli ukiorpassuarni nuannersumik suleqatigiikkumaarluta”.

Jens Aqqaluk ilaquttanilu.