Ilimagisanut naapertuuttumik KNI A/S ukiup affaani siuller-mi naatsorsuutimigut angusaqarpoq

Piffissaq pineqartoq: 1. april – 30. september 2017.

KNI A/S ukiumi naatsorsuuteqarfigisami 2017/18 affaani siullermi akileraarutit suli akilernagit DKK 60 mio.-nik sinneqartoorpoq, ukiup siuliani 2016/17 ukiup affaanut angusat DKK 65 mio.-iusimasut. Naatsorsuutitigut angusat missingersersuusiornermi ilimagineqareersunut naapertuupput.

Ukiumi naatsorsuuteqarfiusumi 2017/18-mi ukiup affaanut angusat aallaavigalugit missingersersuutigineqareersimasutut KNI ukiumoortumik DKK 105-110 mio. –inik sinneqartooruteqarnissaa ilimagineqarpoq.

Suliffeqarfissuup ukiut makkua taamatut sinneqartooruteqartarnissaa pisariaqarluinnarpoq sanaartukkatigut aserfallatsaaliorneqartussat kinguaattoorutaasut aningaasalersorneqartussaammata siunissaq eqqarsaatigalugu, taamaappoq ikummatissaasivissuit pisiniarfiit quersuillu eqqarsaatigalugit. Nioqqutissanik pilersuinermi sanaartukkatigut aserfallatsaaliugassat kinguaattoorutigineqarsimasut DKK 300 mio.-nik naleqarput, saniatigullu ikummatissaasivissuit aserfallatsaaliorneqarnissaannut kinguaattoorutit DKK 200 mio.-ninik naleqarlutik. Pisariaqarluinnartumik  sanaartugassanut aningaasaliissutissat taama amerlatigisut matussutissaqartinneqassappata suliffeqarfiup sinneqartooruteqartumik ingerlanneqarnissaa pisariaqarluinnarpoq.

2016/17-imi ukiup affaanut naatsorsuutitigut sinneqartoorutit DKK 5 mio.-nik ikinnerunerat annertunerpaamik pissuteqarpoq ikummatissamik pilersuinermi sinneqartoorutit ikilinerannit, tamatumali paarlattuanik nioqqutissanik pilersuinermi sinneqartoorutit amerlinerinit. Suliffeqarfissuup ingerlataani allanissaaq ukiup siulianut sanilliullugu ukiup affaani siullermi DKK 0,9 mio.-nik sinneqartoorutit pitsanngoriarput.

Ukiup affaani angusat KNI-ip aningaasaqarneranut patajaallisaasuupput ersiutaallutillu suliffeqarfissuup periusissiorluni qaffasissumik siunnerfilersorluni pitsanngorsaaneranut. Periusissiami siunnerfigineqarpoq sinneqartoorutit amerlisinneqarnissaat, siunniunneqartullu naleqartitallu tunngavigalugit niuernermik kiffartuussinermillu ingerlataqarfiusoq nutaaliaasoq, pisisartunik qitiutitsillunilu "kalaallit inuunerannik ilorlermik" paasinnillunilu ataqqinnittuusup pilersinneqarnissaa.

Ukiup affaanut sinneqartooruteqarnerunermi aammattaaq pissutaaqataalluinnarpoq suliffeqarfissuup sulisuminik piginnaanngorsaajuarnera suleriutsinillu pitsanngorsaajuarnera.

Ukiumi naatsorsuuteqarfiusumi 2017/18 ukiup affaani siullermi kaaviiaartitat 1.250 mio. kr.-iupput, ukiup siulianut 30 mio. kr.-nik amerleriarlutik.

Taakkunannga 703 mio. kr.-it nioqqutissanik pilersuinermi kaaviiaartinneqarput, 539 mio. kr.-it ikummatissamik pilersuinermi kaaviiaartinneqarlutik. Nioqqutissanik pilersuinermi kaaviiaartitat ukiup siulianut sanilliullugit taamaaginnarput, ikummatissanilli pilersuinermi kaaviiaartitat 4,7 %-mik qaffariarput.

Annertunerusumik paasiumasaqaruit pisortaaneq Peter Grønvold Samuelsen attavigisinnaavat pgs@kni.gl imlt. mobilnummer +299 55 37 03.

 ____________________________________ 

Malunginiagassaq: KNI A/S-ip naatsorsuutai 1. april – 31. marts suliarineqartarput, ukiup affaanut naatsorsuutit 1. april aamma 30. september suliarineqartarlutik.