Dansk
English
KalaallisutIkummatissaasivilerisut tullii allagartartaarput
Ikummatissaasivilerisunngortut tassaapput (saamerlerniit): Kaj Eliassen - Nuuk, Jens Johannessen - Upernavik, Jens Arkaluk Brandt - Qasigiannguit, Kim Davidsen - Kangerluarsoruseq, Jafet við Stein - Sisimiut kiisalu Søren Olsvig - Aasiaat.
”KNI Polaroil pilluarit - aajuku sulisussatit pikkorissut Ikummatissaasivilerisunngorniatut nutaanik sakkussaminnik atukkersorneqareerlutik suliffimminnut uternialersut. Aqutsilluarnikkut piginnaasaat inuttullu ataqqillugit mianeralugillu Polaroil-imi pigisigit, angusaqartitseqataalluarnissaat taamaalillugu qulakkiissavarsi.” taamak oqarpoq KNI-ip Pisortaanera Peter Grønvold Samuelsen allagartartaartunut oqaaseqarnermini.
Februarip 24-ani 2019 Ikummatissaasivilerisunngorniarnermik ilinniarnerit aappaat aallartippoq nutaanik peqataasoqarluni. Ilinniartut misilittagartoreersut malunnartumik ilinniakkaminnut pimoorussilluinnarlutik aallussipput. Aqutsineq, sulisunik aallussineq annertuumik sammineqarput.
Ilinniarnerup immikkoortuata aappaa Danmarkimi Sverigemilu ingerlanneqarpoq, Polaroilip niuernikkut suleqatai peqatigineqarlutik. Ikummatissap nunatsinnut ingerlanneqannginnermini aammalu qallorneqarnerminiit suliarineqartarnera angallanneqartarneralu annertuumik sammineqarput. Paasisassarsiornermut tunngatillugu saqqummiinerit tuluttut qallunaatullu ingerlanneqartarput.
Ilinniarnerup immikkoortua kingulleq Sisimiuni Kiffartuussiviup ilinniartitsiviani Taqqissuummi ingerlanneqarpoq. Ilinniarnerup immikkoortuata imaraa ikummatissaasivimmi ingerlatsinermi eqqumaffigineqartariaqartut, nioqqutigisat pillugit paasissutissat aammalu isumannaallisaaneq, ikiueqqaarnerlu. Septemberip 27-ani 2019 Ikummatissaasivilerisut ilinniarnertik naggaserlugu misilitsipput angusillutillu.
”Ikummatissaasivilerineq immini isumannaallisaanerup tungaatigut sukangasuunik maleruagassarpassuaqarlunilu sianigisassarpassuaqarfiuvoq. Nakuniarnartorpassuaqarpoq, ingammik ulapaarfiup nalaani.”
”KNI nutaaq pilersikkiartuaarparput. Sulisut piginnaaneqqortuut KNI-mi pisariaqartippagut. Inuiaqatigiit KNI-mut piumasaqaataat annertoorujussuupput. Ullut tamaviisa nalilersorneqartuarpugut. Ullut tamaviisa, allaat inoqarfinni naliginnaasumik niuernermik tunngaveqartumik akilersinnaasumik ingerlatsiviusinnaanngitsuni kiffartuussisussaatitaavugut. Tamanna tulluusimaarutigalutigu isumagissavarput, inuiaqatigiinnut tunniusimalluta, nunaqqatitsinnik kiffartuussilluarluta.
Taamatut siunnerfeqarnitta anguniarnerani ilissiuvoq kivitseqataasussat. Ilissiuvoq aqutsilluarnissigut sulisunillu siulersuilluarnissigut suleqatissi piginnaasaannik eqqortumik atuisitsinikkut angusassinnik pitsanngorsaaqataasussat. Ilissiuvoq KNI-p siunissaanik qaamanerulersitseqataasussat.”
Piviusut
Ikummatissaasivilerisunngorniarneq KNI A/S-ip nammineq pilersitaa Mindbiz suleqatissatut isumaqatigiissuteqarfigalugu pilersinneqarpoq, ilinniarnermi aqutsinermut sammisut Mindbiz suleqatigalugu ingerlanneqarput, taamatuttaaq Polaroilimi sulisut, taakkualu niuernikkut suleqataat Danmarkimi Sverigemilu aallaaveqartut KNI A/S-ip ineriartortitsinermut immikkoortortaqarfia suleqatigilluinnarlugu ingerlatseqataapput. KNI A/S-ip Ikummatissaasivilerisunngorniarneq nammineerluni aningaasalersorpaa.
Ilinniakkamik naammassinnittuni arfiniliusuni:
- Ataaseq Qasigiannguaneerpoq, ataaseq Sisimiuniit, ataaseq Kangerluarsorutsimiit, ataaseq Upernavimmiit, ataaseq Aasianniit, ataaserlu Nuumminngaanniit.
- Pingasut Ikummatissaasivimmi aqutsisuupput, pingasut sulisuullutik.
- Ukiui agguaqatigiissillugit 50-inik ukioqarput, nukarlersaat 34-nik ukioqarluni.
- Qulit ilinniarlutik aallartipput, marluk ilinniarneq suli ingerlasoq suliunnaarput, ataaseq inuttut peqquteqavilluni, ataaserlu angalaniarnikkut peqquteqarluni.
