Pilersuisoq sinneqartooruteqarnerulerpoq KNI-illu siuariartorneranut nammaqataanerulerluni

Piffissaq matumani pineqartoq tassaavoq: 1. april – 30. september 2016.

Pilersuisoq sinneqartoorutini amerlivai taamaalillunilu Polaroil peqatigalugu KNI-ip ukiumi naatsorsuuteqarfiusumi 2016/17 ukiup affaani siullermi akileraarut sioqqullugu 65 mio. kr.-nik sinneqartooruteqartillugu, ukiup siuliani ukiup affaani siullermi sinneqartoorut 57,4 mio. kr.-iusimasoq.

Ukiumi naatsorsuuteqarfiusumi 2016/17 ukiup affaani siullermi angusat toqqammavigalugit naat-sorsuutigineqarpoq KNI-p ukioq tamakkerlugu 105-110 mio. kr. akornanni sinneqartooruteqaru-maarnissaanik siunniussisimaneq anguneqarsinnaassasoq.

KNI-ip taamatut sinneqartoortuarnissaa pisariaqarluinnarpoq suliffeqarfissuup sanaartugassatigut nioqqutissanik ikummatissanillu pilersuinerani atortuutinik aserfallatsaaliuinermi kinguaattoorutigineqarsimasunik isumaginninnissamut.

Ukiumi naatsorsuuteqarfiusumi 2015/16-mi angusanut sanilliullugu 7,6 mio. kr.-nik sinneqartooruteqarneruneq annertunerpaamik nioqqutissanik pilersuinermit pisuuvoq. Nioqqutissanik pilersuinermi angusat 5,1 mio. kr.-nik siuariarput, ikummatissanik pilersuinermi pitsanngoriaat 2,5 mio. kr.-iulluni. Suliffeqarfissuup ingerlataani allani angusat ukiup siulianut sanilliullugit taamaaginnarput.

Ukiup affaani angusat KNI-ip aningaasaqarneranut patajaallisaasuupput ersiutaallutillu suliffeqarfissuup periusissiorluni qaffasissumik siunnerfilersorluni pitsanngorsaaneranut. Periusissiami siunnerfigineqarpoq sinneqartoorutit amerlisinneqarnissaat, siunniunneqartullu naleqartitallu tunngavigalugit niuernermik kiffartuussinermillu ingerlataqarfiusoq nutaaliaasoq, pisisartunik qitiutitsillunilu ”kalaallit inuunerannik ilorlermik” paasinnillunilu ataqqinnittuusup pilersinneqarnissaa.

Ukiup affaanut sinneqartooruteqarnerunermi aammattaaq pissutaaqataalluinnarpoq suliffeqarfissuup sulisuminik piginnaanngorsaajuarnera suleriutsinillu pitsanngorsaajuarnera.

Ukiumi naatsorsuuteqarfiusumi 2016/17 ukiup affaani siullermi kaaviiaartitat 1.220 mio. kr.-iupput, ukiup siulianut 4 mio. kr.-nik amerlerialaarlutik.

Taakkunannga 700 mio. kr.-it nioqqutissanik pilersuinermi kaaviiaartinneqarput, 515 mio. kr.-it ikummatissamik pilersuinermi kaaviiaartinneqarlutik. Nioqqutissanik pilersuinermi kaaviiaartitat 7,7 %-imik annertuseriarput, ikummatissanilli pilersuinermi kaaviiaartitat 8 %-mik kinguariarlutik.

Nioqqutissanik pilersuinermi kaaviiaartitat qaffariarnerannut pisiniarfinnik ingerlatsineq patsisaanerpaavoq 9 %-imik siuariarfiulluni, kisiannili aamma engrosmi kaaviiaartitat 5,6 %-mik siuariarfiupput.

Ikummatissamik pilersuinermi kaaviiaartitat kinguariarnerat pissuteqarpoq ikummatissaq literinngorlugu tunineqartoq annikilleriarmat akillu appariaateqarnerat kaaviiaartitat aningaasanngorlugit kinguariarnerannut pissutaaqataavoq.

 

Ukiup affaanut nalunaarut 2016/2017 

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl