KNI A/S pillugu tunngaviusumik ilisimasassat

Saamimmiit: Sofie Broberg Qeqertarsuaq, Nuka-Berthe Jerimiassen Qasigiannguit, Panik Rachlev Paamiut, Sørine S. Karlsen Akunnaaq, Finn Mike Nielsen Kangerlussuaq, Jakobine Thygesen Saattut, Bilha Poulsen Atammik, Ludvig Bech Johansen Sisimiut, Otto Gerulff Ilulissat, Markus Kristiansen Qaanaaq, Frederik Josvassen Alluitsup paa, Asa Egede Igaliku, Frederik Thorning Uummannaq, Oline Nielsen Innaarsuit

KNI A/S pillugu tunngaviusumik ilisimasassat pillugit pikkorissarneq ukioq manna aappassaa KNI-p Kiffartuussiviani Sisimiuni ingerlanneqarpoq. Pikkorissarneq ullunik pingasunik sivisussusilik ulluni 20, 21 aammalu 22. november 2018 ingerlanneqarpoq. Peqataasut 14-it sineriammeerput, sumiiffinniit assigiinngitsuneersuullutik.

Pikkorissarnermi matumani peqataaniartut KNI suliffigissallugu, inuttullu ineriartorfigissallugu toqqarsimasussaavaat, ulluinnarnilu suliffimminni aalajaatsuullutillu tunniusimalluartuussallutik.  Sulinerminnilu pilliuteqarnermikkut KNI-mik naleqarnerulersitseqataanissamut assut kajumissuseqartuussallutik. KNI-mi naleqartitat KNI-llu periusissiaa Killingusaaq paasisimasaqarfigereersimassavaat.

Pikkorissarnerup siunertaraa sulisut amerlanerusut KNI-p oqaluttuarisaanera, suliffeqarfissuartut aaqqissuussaanera, kiffartuussisussaatitaaffii, periusissiaa suliffeqarfissuullu iluani ileqqut allassimasut allassimanngitsullu suunerinik itinerusumik paasisimasaqarlualernissaannik pikkorissarneq siunertaqarpoq.

Ulloq siulleq pikkorissarneq aallartimmat, peqataasut arlallit imminnut ilisarisimanngillat, taamaalillutillu pissangaqqaarsimapput. Ullut tulliuttut marluk imminnut ilisarisimanerulerput, oqallinnernilu akuunerulerlutik alapernaannerulerput.

Pikkorissarneq naammassimmat peqataasut unnersiorput imminnut ilisareqatigiinnertik qiimmaallaatigisimallugu. KNI A/S-illu oqaluttuassartaa, suliffeqarfissuullu maannamut inissisimanera paasisaqarfigalugu, amerlasuut eqiiallaatigalugu sumiiffimminnut uterunik tunniussassaqarlutik paasisaminnik siammartererusullutik unnersiorput.

Ilaat qujanermini ima ilassuteqarpoq: ’Nutaanngortutut misigalunga angerlalerpunga, neriuppunga taamatut kursus-ertitsisarneq ingerlanneqaannassasoq’.

Pikkorissarnermi peqataasut angerlarunik suleqatitik kajumissaarusuppaat pikkorissarnernut tulliuttunut ilaaqqullugit, aammalu pikkorissarnermi sammisimasatik siammerterusuppaat tamanut iluaqutissanngorlugit.

Matumuuna pikkorissarnermut soqutiginninneq annertuvoq, peqataajumallutik qinnuteqartut amerlapput, 90-it tungaanut qinnuteqarsimagamik.

KNI-p Taqqissuut aqqutigalugu suliffeqarfissuarmi sulisunik pisortassanillu piginnaanngorsaanera ineriartortinneqartuassaaq.

Maannamut uku ilinniartitaanerit ukiut tamaasa pisartussatut aalajangiussaapput:

Niuertunngorniarneq

Ikummatissaasivilerisunngorniarneq

KNI A/S pillugu tunngaviusumik ilisimasassanik pikkorissartitsineq

Aqutsisunngorniarneq (taanna maannakkut piareersarneqarpoq, ukiullu tamaasa aamma ingerlanneqartassalluni.