KNI ileqquusumik ataatsimeersuarpoq

Pingasunngornermi 15. august 2018 KNI A/S ileqquusumik ataatsimeersuarpoq. Piginnittut sinnerlugit Naalakkersuisut siulittaasuat Kim Kielsen ataatsimeersuartitsisuuvoq.

Ataatsimeersuarnermi siulersuisut nalunaarutaat tusaatissatut tiguneqarpoq ukiumoortumillu naatsorsuutit 2017/18-imoortut akuerineqarlutik.

KNI-mi siulersuisut siulittaasuat Høgni Hansen nalunaaruteqarnermini ilaatigut ima oqarpoq: "Ukiumut angusat – akileraarut ilanngaatigereernagit 103,4 mio. kr. –nik angusaqarnermigut ukiumi kingullermi naatsorsuutitigut angusami asserluinnaanik suliffeqarfissuaq angusaqarpoq. Taamatut angusaqarnikkut aalajangiusimaneqarpoq ukiuni kingullerni tallimani naatsorsuutitigut angusarissaartarnerup nangittumik siuariartorfiunera. Ukiumoortumik angusat – siorna angusat ilanngullugit – pitsaanersaapput suliffeqarfissuup ukiuni kingullerni arlalinni angusarisarsimasaanut sanilliullugit."

Naalakkersuisut Siulittaasuat Kim Kielsen nersualaarinnippoq, sulisut, aqutsisut siulersuisullu qutsavigalugit. Ilaatigullu oqarluni: "Namminersorlutik Oqartussat suliffeqarfissuaataasa sulisuminnik piginnaanngorsaanissaat Naalakkersuisunit kissaatigaarput. Taamaattumik KNI tamatuma tungaatigut, soorlu Niuertunngorniarnermik Ikummatissaasivilerisunngorniarnermillu aallartitsillutillu aallussilluarnerat nersualaartariaqarpara."

Ataatsimeersuarnermut inassutigineqartutut ataatsimeersuarnerup aalajangerpaa, piginnittunut DKK 20 mio.-it sinneqartoorutisiaritinneqassasut. Taakku saniatigut ukiumi naatsorsuuteqarfiusumi sulisut akileraarutaat 75 mio. kr.-iusut, kiisalu 25 mio. kr.-it selskabsskat inuiaqatigiinnut akiliutigineqarput.

KNI 1.000 missaanniittunut suliffissaqartitsivoq ukiumullu 130 mio. kr.–it naliginut sanaartornermut atortarlugit.

KNI A/S nutaamik siulittaasortaarpoq

Royal Arctic Line A/S-imi CCO-tut atorfilik Lars Borris Pedersen KNI A/S-imi siulittaasutut ataatsimeersuarnermit qinerneqarpoq. Siulersuisut sinneri tamakkerlutik qinigaaqqipput.

Deloitte, Statsautoriseret Revisionsaktieselskab, suliffeqarfissuup kukkunersiuisuisut qinerneqaqqipput.
KNI-p siulersuisuisa KNI-mi pisisartut, sulisut niuernikkullu suleqatigisat tamaasa qutsavigivaat.

Annerusumik paasisaqarniaraanni pisortaaneq Peter Grønvold Samuelsen attavigineqarsinnaavoq oqarasuaatikkut +299 55 37 03 imaluunniit e mail: pgs@kni.gl atorlugit.

____________________________________
• Årsregnskabsperioden for KNI A/S er 1. april – 31. marts.