KNI A/S ukiup affaani siullermi angusarissaarpoq

Piffissaq nalunaarusiorfiusoq: 1. april – 30. september 2019

Piffissaq naatsorsuuteqarfiusoq

KNI 2019/20-mi naatsorsuuteqarfigisamini ukiup affaani siullermi akileraarut suli ilanngaatiginagu DKK 81,1 mio.-nik sinneqartooruteqarpoq, ukiup siuliani ukiup affanut DKK 72,8 mio.-nik sinneqartoorsimalluni. Taamaalilluni ukiup naatsorsuuteqarfiusup aallartinnerani missingersersuutaareersimasut naapertorlugit angusaqartoqarpoq.

KNI A/S-ip naatsorsuutigaa ukiup affaani kingullermi ukiumi naatsorsuuteqarfiusumi 2019/20-mi angusarineqarumaartutut missingersersorneqareersimasut anguneqarnissaat, tassalu DKK 112-118 mio. kr.-it missaanni sinneqartooruteqarumaarluni, akileraarut suli ilanngaatiginagu.

Ukiup affaani siullermi ukiup siulianut sanilliullugu DKK 8,3 mio.-nik sinneqartooruteqarneruneq makkunannga pissuteqarpoq:

• Nioqqutissanik pilersuinermi DKK 3 mio.-nik angusakinneruneq, pingaartumik nioqqutissanik akikilliliilluni neqerooruteqartaqattaarnermit pissuteqartoq.
• Ikummatissanik pilersuinermi DKK 9,0 mio.-nik sinneqartoorneruneq
• KNI-p ataani ingerlataqarfiit DKK 3,0 mio.-nik sinneqartooruteqarnerunerat

Ukiup affaanut naatsorsuutit atuarneqarnerini eqqumaffigineqassaaq, suliffeqarfissuup ikummatissaarniarnermik immikkoortortaata aningaasanik isaatitsinera annertunerpaaq pisarmat ukiup affaani siullermi.

Ukiup affaani angusat suliffeqarfissuup siunnerfilimmik pilersaarusiorluni anguniagaanut aningaasatigut patajaatsumik tunngavissaqalersitsipput, suliffeqarfissuullu suli ineriartoqqissinnaaneranut angusarissaarnerunissaanullu upperinnilersitsillutik.

Angusarissaarneq aamma minnerunngitsumik pissuteqarpoq sulisunik ukkassineq piginnaanngorsaanerlu oqaasiinnaanngitsutigut annertuumik ingerlanneqarmat, suleriaatsit periutsillu nutarterneqartuarlutik.

Ukiumi naatsorsuuteqarfiusup 2019/20 affaani siullermi kaaviiaartittat DKK 1.313 mio.-iupput, ukiup siulianut sanilliullugit taamaaginnarlutik.

Nioqqutissanik pilersuinermi DKK 737 mio.-it kaaviiaartinneqarput. Ikummatissamik pilersuinermi DKK 571 mio.-it kaaviaartinneqarput. Kaaviiaartitat ukiup siulianut sanilliullugit taamaaginnarput.

Sanaartornermut aningaasaliissutit

Suliffeqarfissuup taamatut sinneqartooruteqarfiusumik ingerlanneqarnissaa pisariaqarluinnarpoq sanaartukkatigut nutarterinerit aserfallatsaaliuinissamilu kinguaattoorutaasimasut angummaffigineqarlutik akissaqartinneqassappata.

Nioqqutissanik pilersuinermi sanaartugassatigut aserfallatsaaliugassat kinguaattoorutaasut DKK 265 mio.-nik naleqarput, ikummatissaasivissuillu aserfallatsaaliorneqarnissaannut kinguaattoorutit DKK 130 mio.-nik naleqarput. Tamakku isumagineqassappata suliffeqarfissuup sinneqartooruteqarneratigut taamaallaat akilerneqarsinnaapput.

Naatsorsuutit pillugit paasisaqarnerorusukkuit pisortaaneq Peter Grønvold Samuelsen attavigisinnaavat pgs@kni.gl-imut imlt. Mobil nr. +299 55 37 03-imut.

Maluginiagassaq: KNI A/S ukiumoortumik naatsorsuusiortarpoq 1. april – 31. marts.