Edvard Frederiksen fortjenstmedalje sølviusumik saqqarmiulerneqarpoq

Qeqertami niuertoq Edvard Frederiksen ullumikkut sapaammi 15. december 2019 ataqqinartorsuup Dronning Margrethe aappaata nersornaasiuttagaanik sølv-iusumik saqqarmiulerneqarpoq. Saqqarmioq fortjenstmedalje naalagaaffiup suliffeqarfiutaani ukiorpassuarni aalajaallutik sulisimasunut tunniunneqartarpoq.

Saqqarmiumik tunniussisuuvoq Polaroil-imi siunnersorti Paulus Lyberth, taanna KNI-p pisortaaneranit piumaffigineqarami aalaniarluni ippassaq arfininngornermi Sisimiuniit Ilulissanut timmisartumik angalavoq, tassanilu Orasila-mut Qeqertamukalersumut angumersilluni, ullaaq mannalu sapaammi Qeqertami saqqarmiuliineq isumagalugu.

Edvard Frederiksen aasaq 1. juli 2019 KGH-mi/KNI-mi sulisimanermini ukiuni 40-inngortorsiuivoq.

Saqqarmiuliinermut atatillugu Paulus Lyberth naatsumik oqaaseqarpoq, ilaatigut oqarluni:

"Tamassi tikilluaritsi. Paalusimik ateqarpunga, Paulus Lyberth, ukiuni 50-inngulersuni Polaroil-imi sulisuuvunga, maanngarpungalu naliginnaanngitsumik suliassaqartitaallunga, tassa KNI A/S-imi pisortaanerup Peter Grønvold Samuelsen-ip piumaffigisimavaanga suliassamik pingaaruteqartumik naammassinnikkiartoqqullunga, tamassilu Piitamit inuulluaqqutissavassi.

Asasarput, suleqaterput, niuertoq Edvard Frederiksen aasaq manna KGH-mi KNI-milu sulisimanermini ukiuni 40-inngortorsiorpoq. Taqqi pilluakutsoorit. Ukiorpassuupput, taamatullu misilittagaqarluni nalunarneq ajorpoq inuuneq sulinerlu narlorissuinnarsiorfiullunilu manissukajaakkuuginnarfiusartoq. Ullut ilaat oqimaannerusarput aammali ilarpassui ilami amerlaneroqisut nuannersumik eqqaamasaqarfigisarpagut. Qularinngilara Taqqi illittaaq taamatut eqqaamasaqassasutit ukiut kingumut eqqarsaatigalugit.

Naalagaaffiup suliffeqarfiutaani ukiorpassuarni aalajaallutit tunniusimallutillu sulisimanerit pissutigalugu kalerrinneqarsimavugut ataqqinartorsuup Dronning Margrethe aappaata nersornaasiuttagaa fortjenstmedalje sølv-iusoq ilinnut saqqarmiuliunneqassasoq. Tamannalu tassa maannarninnut pissutaasoq.
Taamaalillungalu maanna nersornaat Taqqi illit sakissarnut kapputissavara.”