Diploma In Business Administration

KNI A/S aamma Business Institute Denmark suleqatigiillutik suliffeqarfinnillu allanik peqataatitsillutik Pre MBA-mik ilinniarneq ingerlateqqammerpaat.

Pre MBA kimulluunniit aqutsinermik misilittagalimmut aqutsinermilu atugassaminik annertusaanissaminik kissaateqartumut sammivoq.

Ilinniartitaaneq atuagarsornikkut ilisimasarialinnillu atuagarsuutiginninnikkut qaffasissumik ingerlatsiviusussaammat ilinniartitaanerup naammassinissaa siunertaralugu inuttut imminut annertuumik piumaffiginissamik piumasaqaatitaqarpoq.

Ilinniarneq modulinut pingasunut aggugaavoq. Ilinniarnerup ingerlanerani allattariarsornermik suliassat pingasut qupperneqqortusiartortut tunniunneqarlutik, oqaluttariarsornermilu misilitsinnerit marluullutik. Pre MBA-mi ilinniarnermi moduli siulleq ingerlanneqarpoq februar 2018-imi, ullut sisamat pikkunartumik ilinniarneq ingerlanneqarluni. Modulit aappaat aprilip aallartinnerani ingerlanneqarpoq, kingullerlu junimi ingerlanneqarluni.

Ukiup siulliup affaata ingerlanerani modulit pingasuusut tamarmik, misilitsinnerit marluk allagartartaartitsinerlu KNI-p Kiffartuussiviata atuartitsiviani Taqqissuummi ingerlanneqarput.
Peqataasut 18-iusut KNI-minngaanneersuinnaanngillat, aammali suliffeqarfinnit allanit illoqarfinniillu assigiinngitsunit aggerfeqarput.

Suliffeqarfiit peqataatitaqartut ukuupput:

• KNI A/S-imit peqataasut 8
• Qeqqata Kommunianit peqataasut 4
• Hotel Sisimiunit peqataasoq 1
• Mittarfeqarfiinniit peqataasut 3
• Arctic Circle Businessimiit peqataasoq 1
• Sulisartut Højskolianniit peqataasoq 1

- Tulluusimaarnarpoq KNI A/S-ip suliniuteqarneratigut piginnaanngorsarneq qaffasittoq maani Sisimiuni ingerlanneqarsinnammat, suliffeqarfiillu allat neqeroorut tamanna peqataaffigerusummassuk, Peter Grønvold Samuelsen Pre MBA-mut ilinniarneq februar 2018-imi aallartimmat taama ilaatigut oqaaseqarpoq.

22. august 2018 aallartittunit 18-iusunit 13-it misilitsipput tamarmillu angusillutik.
Allagartartaartitsinermi Business Institute-mi Rektorip, direktørip aallarniisuusullu Lars Ib-ip nuannaarutiginerarpaa qutsatigalugulu ilinniarnerup Sisimiuni pitsaasumik avatangiiseqarluni ingerlanneqarsinnaasimanera.

Pisortaanerup Peter Grønvold Samuelsen-ip oqaaseqarnermini nuannaarutiginerarpaa ilinniarnerup Sisimiuni ingerlanneqarsinnaaneranut neqeroorut Business Institute-mit akuersaarneqarsimanera nangillunilu ilinniarsimanermut uppernarsaat timitalerlugu sakkussanik pissarsianik sulinermi atuiffiginngikkaanni naammanngitsoq, allagartartaartullu tamaasa pilluaqqullugit.

Sisimiut avataaniit peqataasut Qaqortumiit, Nuummiit Maniitsumiillu peqataasuupput.