KNI A/S suliffeqarfiillu allat arfinillit Minngortuunnguup Atuarfiani 9. klassenik naapitsisut 

Sisimiuni suliffeqarfiit arfineq marluk kiisalu Minngortuunnguup Atuarfiani 9. a+b tallimanngorneq 18. november 2016 ullaap tungaa naapipput. Nalunaaquttap akunneri marluk ingerlaneranni suliffeqarfiit ataasiakkaat imminnut ilisaritipput, suna suliarisarnerlugu, ilinniakkat suut atorfissaqartinneqarnersut il.il..

Aaqqissuussineq una ukiunut marlunnut ingerlatassatut pilersaarummut,  Suliffeqarfiit atuarfinnut – Atuarfiit suliffeqarfinnut, attuumassuteqarpoq. CSR Greenlandip suniutaa piffissami 2015-2017-mi illoqarfinni sisamani Qaqortumi, Paamiuni, Sisimiuni Aasiannilu ingerlanneqarpoq. Immikkut ukkatarineqartut tassaapput ukiormanna atuarfiusumi 9. klassiusut, taakkorpiaallu naapinneqarput.

Sisimiuni suliffeqarfiit, taakku ilagalugu KNI A/S, 2015-imiit assigiinngitsunik aaqqissuussisarput, suliffeqarfiit atuarfiliartarlutik atuartullu suliffeqarfinnut pulaartarlutik.

Suliniutip massuma siunertaraa atuartut uku meeqqat atuarfiat qimakkunikku ilinniaqqinnisamut piumassuseqarluarnissaannik sunniinissaq, tamannalu atuarfiup taassumalu ungataanniittut suliffeqarfiit suleqatigiinnerisigut aamma sulissutigineqarpoq.

Tola Ludvigsen aamma Karl Berthelsen 9.a-nut 9.b-nullu klasselæreriupput.

Tola Ludvigsen:
- Suliniut manna aqqutigalugu suliffeqarfiit ukiormanna kingusinnerusukkut praktikkerfissatut qinnuteqarfigisassatik uku atuartut ilisimasaqarfiginerulereerpaat attaveqarfigilereerlugillu. Malugisinnaavarput perunganerusut, ilisimasaqarnerulernissamut soqutiginnillutik imminnullu tatiginerullutik. Taakku ilarpassuisa sunngorniarnissartik takorluulereersimavaat. Qaffasissumik angusaqarusupput.