Sulisutsialak 2018

KNI A/S Sisimiuni Kiffartuussivimmi sulisuni tamaasa Kiffartuussiviup Nerisarfianut tallimanngornermi 14. december 2018, nal. 15:15 aggersarsimavai, tupaallatsitsisoqarfiusumut.

KNI-mi pisortaaneq Peter Grønvold Samuelsen tikilluaqquseriarluni oqalungiarpoq, aallarniutigalugu aaqqissuussinermut tunuliaqutaasoq, manna tikillugu tamanut isertuunneqarsimasoq.

Aaqqissuussinerup siunertaa qulaarneqareeriarmat KNI-p Kiffartuussiviani ukiumi matumani sulisutsialaat pingasut toqqarneqartut oqaaseqarfigineqarput, tassaasut Tage Lindegaard, Ernipajuk aamma Per Jensen. Toqqagaanerannut tunngavilersuutigineqarpoq naliginnaasumit annerujussuarmik KNI-mut sulinermikkut naleqarnerulersitseqataasimanerat.

Qujanartumik suleqaterpassuaqarpugut suliffimminnik paarsilluartunik, piginnaasaqarluartunik piginnaasaminnilluunniit ineriartortitsiuartunik.

Sineriammi suleqaterpassuaqarpugut suliffimminnut suliaminnullu tunniusimalluinnartunik, suleqatiminnullu maligassiuisunik, immaqa ilaanni qujaffigineqarnissaminnik nersorniarneqarnissaminnillu tusartinneqarneq ajortunik.

Taama aallarniuteqariarluni pisortaanerup sulisutsialaat pingasut sooq taakku toqqarsimanerlugit imatut tunngavilersuuteqarpoq:

Tage Lindegaard

”Polaroil-imi teknisk chef-itut atorfeqartoq, KNI-mi ukioq 2000-mili atorfeqarsimavoq. Tage 1998-imi taamannikkut Maniitsup Kommuniani sanaartornermut immikkoortortaqarfimmi atorfinikkiartorluni Nunatsinnut pisimavoq. Taamaalilluni Tage ukiut 20-it sinnerlugit Nunatsinni najugaqarsimavoq, taakkunannga ukiuni 19-ni KNI-p iluani suleqataasimalluni.

Maani ataatsimoornissarput pillugu Tage ilisimatinnikuuara, neriorsorsimallugulu ilaquttanilu tikeriarpata maani aaqqissuussiffigiumaaripput. Oqaatigisinnaavara ullumi Tage attavigiganni tulluusimaarlunilu nuannaartorujussuummat, nammineq ullumikkut KNI-mi pineqarnini kisiat pinnagu, kisiannili annermik, soorlu nammineq imatut oqaasertalermagu:

”Erneq angajulleq ullumikkut industritekniker-itut ilinniarnini naammassillug uppernarsaammik tunineqarpoq. Tassunga ulloq angeqaaq, kiisalu aajuna ataataq tulluusimaangaartoq.”

Tupinnartarpoq Tage-p qanoq nammataqarsinnaatigisarnera, suliffimminut qanoq tunniusimatiginera Polaroil-imut KNI-mullu qanoq ilumoortigisuunera. Angeqaaq. Taamaattumik Tage, qujanarsuaq. Pilluarillu ullumi ernerit pillugu.”

Ernipajuk

”Maani Kiffartuussivimmi aamma suleqateqarpugut imaannaanngitsumik. Tassalu Ernipajuk. Ernipajuk 1970-imi KGH-toqqami maani Sisimiuni ilinniartunngorsimavoq. Taamanikkut pisartut ilamininngui oqaluttuaringai tusalaarnikuuakka, ilaatigut Saamuakkut allallu maani Sisimiormiutoqqat ilinniarfigalugillu ilinniartitsisorisimagai, ilaasa aqqi tusaamanartarput, namminerluunniit taamanikkut sulisut takusimanngikkaluarlugit.

Ernipajuk KGH-toqaq perorsarfigisimavaa. KGH pisoqaq angumerilluarpaa, ukiunilu KGH-mi KNI-milu suliffimmik aaqqissuusseqqinnerpassuit aqqusaarsimavai peqataaffigisimallugillu. Sineriammi Niuertutut atorfeqartarsimavoq, ilaquttanilu nuuttarsimapput, qitiusumillu allaffeqarfimmi assigiinngitsunik qaffasissumik akisussaaffeqartuarsimavoq.

Nalunanngilaq Ernipajuk suliffitsinnut ilisimasaqarnerpaat ilagigaat. Suliffimminut ataqqinnittuuvoq, suliffimminut tunniusimasuuvoq, suliffimminut tunniussaqarusuttuuvoq, ineriartortitseqataavoq, suli maannamut.

Ernipajuk KNI-mit qujassutissaqarfigaatsigit assorsuaq, ilisimasatit atorfissaqartippagut, qujanarsuaq maligassiuigavit, qujanarsuaq.

Per Jensen

”Suleqatitta pingajuat immikkut oqaaseqarfigerusutara qasusuillunilu imminut eqqarsaatiginani KNI-mullu ilumoorluinnarluni suliuartoq tassaavoq Regnskabschef-erput, Per Jensen.

Ullaakkut tamatta sioqqulluta suliartortarpoq, kingullerpaanullu ilaalluni allaffik qimattarpaa. Soraareeraluaraangamiluunniit, mail-ikkut attaveqartuartarnera najoqqutaralugu nalunarneq ajorpoq angerlarsimaffimminiit, amerlasuutigut unnuarsuarmut, allaammi unnuap qeqqa qaangerlugu suliuartartuusoq. Tamanna pisarpoq ullut tamaasa sapaatip akunneri naaneri apeqqutaatinnagit.

Tupigusuutigisarpara inuup taassuma qanoq suliaminik pitsaanerpaamik naammassinninniarluni naammagittartigisinnaanera. Naatsorsuuseriinnanngilaq. Tassami immikkoortortani akisussaasut ilitsersortuarpai ikiortarlugillu. Qaammatikkaartumik naatsorsuutit katiterneqarneri, nakkutigineri, pitsaalluinnartuunissai il.il. isumagisussaasarpai, ukiup affaanut ukiumullu tamarmut naatsorsuutit suliarisussaasarpai, ingammillu divisionit naatsorsuutaanik suliaqarnermi ilitsersuisuullunilu ataqatigiissaariuartuuvoq. Selskabit KNI-mit pigineqartut nakkutigisassarai, Neqi isumagisussaavaa, savaaqqat toqorarneqartussaapput, naatsiiallu katersorneqartussaallutik nioqqutigineqartussaallutillu.

Per qujanarsuaq suliannut. Julefrokost-eratta kingullermik maqaasivatsigit, allanillu erinarsortoqaannartariaqarsimalluta.