Anders Stenbakken KNI A/S-imi ussassaarinermut pisortanngussaaq

Anders Stenbakken (55) ullumikkut Nunatsinni takornariaqarnermut sullissiveqarfimmi Visit Greenland-imi pisortaasoq 1. august 2017 KNI A/S-imi ussassaarinermut pisortanngortussanngorpoq.

Anders Stenbakken ukiuni arfineq marlunni Visit Greenland-imi pisortaareerluni aasamut soraartussaavoq, suliamik allamik misileerusukkami, Kalaallit Nunaalli iperavissinnaasimanngilaa.

Anders Stenbakken meeraallunili Kalaallit Nunaanni najugaqaqqaarsimavoq angajoqqaami ilinniartitsisutut sulinerini. Namminerlu ilinniartitsisunngorami Tasiilamut ilinniartitsisunngoriartorsimavoq, tassanilu ukiuni 16-ni najugaqarsimalluni. Ilinniartitsisooreerami fritidsinspektøritut, kiisalu ukiuni arfineq pingasuni tunumi takornariartitsivimmi Destination East Greenland-imi pisortaasimalluni. Anders Stenbakken-ip Nunatsinni ilisarineqaataasa ilagaat The Arctic Team Challenge pilersillugulu 1999-imiit 2007-ip tungaanut Tasiilami ingerlattarsimagamiuk, timersuut imaannaanngitsoq qajartornermik, arpannermik qaqqasiornermillu aqqusaagassartalik, kiisalu isiginnaagassiat A Taste of Greenland-inik taaneqartut suliarineqarneri isumassarsiaralugillu piviusunngortissimallugit.

KNI-p pisortaanera Peter Grønvold Samuelsen oqaaseqarpoq:
"Anders Stenbakken-ip atorfinitsinneqarneratigut KNI nukittuumik piginnaasaqqortuumillu ussassaarinermut pisortaqalerpoq, KNI-p suliffeqarfittut ilisaritinneqarnissaanut tuniniaanerlu eqqarsaatigalugu pimoorusserpalaarnerusumik ingerlatsilernissaanik qulakkeerinnittussamik.
Pisisartunik qitiutitsineq kiffartuussinerlu pitsaanerusoq oqaasiinnaajunnaarsissagutsigu pisisartut pisariaqartitaat paasisimanerulertariaqarpagut, periusissiatsinnilu Killingusaaq-mi "kalaallit inuunerat ilorleq" tunaartaralugu KNI-p kinaassuseqalersinniarnera aallutissavarput.
Nuannaarutigeqaara, ukiut kingulliit pingasut sangujoqilaarata siunnerfeqarluartumik ulapaarsimanitsigut KNI suliffeqarfittut nutaaliaasutut pilerinarnerulersissimagatsigu, allaat malugisinnaalersimallutigu suliaminnut piginnaaneqarluartut KNI-mi suleqataarusullutik saaffiginnittalersimanerat. Tamanna immini annertuumik oqaluttuarpoq."

Anders Stenbakken oqaaseqarpoq:
"KNI-p oqaluttuarisaanera imartoqaaq inuiaqatigiinnilu tunngaviusutigut suliaqarfia annertoorujussuulluni; tamatumalu oqaluttuanngortinneqarnissaa ussassaarutiginissaalu uannut suliassaavoq pissanganarluinnartoq, periarfissarpassuaqarlunilu unammilligassarpassuaqarfiusoq.

Qilanaavissorpunga KNI-mi suleqataalernissannut, Piitap suleqatigiit pikkorissut pilersissimasaanut akuulerlunga."